Izakhamizi zemaphandleni eZansi yemaNdebeleni zikhala ngokuthi zihlaselwe yindlala ngesikhathi kulungiselelwa ukhetho. Inengi litho lifisa ukhetho lubuye ludlule ukuze libuyele empilweni yansunkuzonke.
Inengi lalezi zakhamizi lithi umangoye uselala eziko kulenzisuku ngoba uncedo lokudla okuvela uhulumende lumisiwe kulezinsuku zokhetho.
Ngalokhu UMnu Gabriel Luphondo oyisakhamuzi seMawane eGwanda South uthi inengi selifisa ukuthi ngabe ukhetho luphanga ludlule.
"Indlala kuphela yiyo ehlupha abantu njengoba abantu babejayele ukuholela lwesocial Welfare ayisekho abantu bayakhala bathi ama elections akhona lawo sephuzile ukuthi bake bathole ukudla, ukudla akula kodwa kwezombusazwe sindawonye siyabe sihlekana nje, lapha eMawane bekungekho okuhluphayo."
Lamazwi agcizelelwe nguNkosikazi Siphathisiwe Nkala oyisakhamuzi seMatshetsheni eGwanda North.
"Umnyaka susiyaphela ekupheleni kunje isimo sendlala sesithanda ukuba nzima sibili ngoba abantu ababekudobhile emasiminibekukulutshwane njalo sokuphelile sokudingeka ukuthi ngabe abantu bayancediswa abantu sebephila ngokuthenga yobaleyo impuphu ama10kg."
UNkosikazi Julieth Nkiwane oyisiphathamandla senhlanganiso emela amalungelo abomama lamantombazana emaphandleni eyeWomen Development Association of Zimbabwe uthi akukabi lokuphithizela kukhetho lwalonyaka.
"Asikaboni lutho, asikakaboni, yebo amabizo seyaziwa ukuthi oweZanu PF ngubani, oweMDC ngubani, oweMthwakazi ngubani, nje iMatabeleland South yonke amabizo sesaziwa kodwa ukuphithizela kwecampaign yeminye iminyaka asikayiboni lokhu simelele ukuyibona iqalisa."
Lanxa kulokuthula kulesisabelo amabandla aphikisayo akhala ngokwethuselwa kwabalandeli babo ngabebandla elibusayo leZanu PF.
Ekhuluma ngoMvulo eGwanda emhlanganweni webandla leZanu PF yokukhankasela ukhetho umphathintambo obona ngezenzakala kweleZansi yemaNdebeleni UMnu Abedinico Ncube ubike ukuthi ulemitshina azayisebenzisa ukubona uzulu ngosuku lokuvota.
"Akusamelanga kube lomuntu ozatholakala elele engayanga vota, hambanani liyevota, mina ngizabe ngikhangela ukuthi ovotileyo ngubani ongavotanga ngubani ngemitshina yami ngikhonapha ngihlezi."
UMnu Cannicious Nkala unobhala wezokhetho kubandla leZAPU uthi banengi kubandla leZanu PF abethusela uzulu emaphandleni.
"Amathreats lawa kawaveli kuye kuphela uMinister ekuhambeni okwami ngisiya emaphandleni sengihlangane lokwethuselwa okunjalo kuWard 10 Beitbridge bayethuselwa abantu nxa behlanganela labantu beZAPU lamanye amabandla ngama war veterans, siyi Zapu sithi akula kuyethuselwa okunganani okuzakwenza ukuthi abantu bengabikwazi kanti kuyini okwehlula ukufa kathesi nxa abantu bevele belamba."
Ibandla leZanu PF lihlezi lithi lona ngeke lethusela muntu ngoba lulabasekeli abanengi kakhulu.
Ikhomishini ebona ngezokhetho eyeZimbabwe Electoral Commission luthi kuyize ukuthi umuntu uyabonakala lapho evota njalo lukhathaza uzulu ukuthi ayevota ngobunengi mhla zingamatshumi amabili lantathu kulinyanga.
Your browser doesn’t support HTML5
Ezemaphandleni siloAlbert Ncube