Bekugcwele kunyakazela abantu bebuye ngobunengi eAmphitheatre, kuhlatshelelwa, kugidwa kukhunjulwa uElvis Mathe odume ngokuthi MaElli lomunye wakhe, uThembinkosi ‘Maviri’ Mpofu otshaya ama drum, ababubhele engozini yomgwaqo osuka koBulawayo usiya eVictoria Falls ngomgqibelo weviki edluleyo, bengamalunga amabili eqembu lezomculo weRumba Insimbi ZeZhwane.
Ekhuluma embuthamweni wababili abaphiwe inhlonipho yeqhawe lenkululeko yesizwe, umphathintambo wedolobho lakoBulawayo uNkosikazi Judith Ncube, uthe uhulumende udabukile ngesehlakalo esehlele leliqembu.
INsimbi Zezhwane memorial service
"Abanye bethu, baginywe yikufa nampa balele phambi kwethu, abanye siyabakhangela esibhedlela. Abakhilekayo, sicela sikhulekeni ngoqotho. Sicela umusa ungenele kuzimuli. Ngithanda ukubonga ngokuqakathekileyo, ama-artists hlalani linjalo zihlobo zami thats the way to go. Unite for a cause," kutsho uNkosikazi Ncube.
Udadewabo ka Thembinkosi Maviri Mpofu otshone kulingozi uNkosazana Thembelenkosini Makhwelo yena ulandise ngomfowabo: "UThembinkosi wakhuliswa ngumamami, umamakhe wabhubha kudala, ubezelwe eyi 1 kumamakhe.
INsimbi Zezhwane memorial service
"So umama wamthatha emncane wamkhulisa, wamfundisa ah kubuhlungu kakhulu ngoba vele sikhule sitshayana loMaviri,sidlala sitshayana sinikana ama nickname, ah kubuhlungu kakhulu."
Abaculi abanengi bathi balahlekelwe ngokubhubha kwababili laba. Okufakazwa nguClement Magwaza wabakade besebenza labo.
Uthe, "Abafowethu bengiphila labo kabuhlungu bangitshiye kabuhlungu okwenzakeleyo kubuhlungu mani bakithi uyazi kukhathaze imoya yethu kakhulu. Inkosi kayingenele yazi umfowethu uBrema laye alulame umfana labafana abasesibhedlela balulame sikwazi ukuthi siqhubeke ngemsebenzi siyephambili. Engingakubika kakhulu yikuthi bantu bakithi lingapheli amandla ade libasapota abafowethu."
"Ma Eli lawe maViri hayi, litshiyele isikhala esikhulu kakhulu lisizwise ubuhlungu kodwa kungasenani kubeyintando yenkosi. Thina okwethu yikuthi silikhulule lihambe, lihambe kuhle lilale ngoxolo siyalithanda." kutsho omunye umculi olodumo osebuhlungwini nguNkwali.
INsimbi Zezhwane memorial service
Omunye njalo umculi uThandie Dlana ocula ekoBulawayo, uthi, “Inhliziyo yami iphatheke kabi, inhliziyo ibuhlungu ngokulahlekelwa ngobhudi bethu emculweni ngesihluku esingaka sengathi uJehova angapholisa amanxeba kwabaseleyo imuli labangane lezihlobo. Sengathi imphefumulo yabo ingalala ngokuthula.”
Imbongi elodumo uAlbert Nyathi uthi isizwe seZimbabwe silahlekelwe kakhulu.
"Mhlaba kawunoni, mhlaba kawusuthi mhlaba kawulanhloni. Thatha abafana abancane abantwana abancane ebesikhangelele kubo. Inhliziyo zethu zigcwele usizi, inhliziyo zethu zidabukile kakhulu ukulahlekelwa ngumaEli loMaviri. Silethemba lokuthi la amajaha aseleyo azaqhubekelisa umsebenzi abawuqalayo phambili. Ngithi majaha akithi bantwabami lalani ngokuthula."
INsimbi Zezhwane memorial service
NgoLwesihlanu isidumbu sika muyi uElvis Mathe sihanjiswe ekhaya kibo eMagela eTsholotso lapho azangcwatshwa khona. UThembinkosi Maviri Mpofu yena uzabekwa eLuveve koBulawayo ngeSonto.
Amaqembu ezomculo azatshaya kuze kuse eTsholotsho, kusukela NgoLwesihlanu, ephelekezela abangani babo.
Your browser doesn’t support HTML5
Udaba lwabaculi abafele engozini yomgwaqo siluphiwa nguEzra Tshisa Sibanda