Ibandla leCCC selethule iziloyiso ezingamatshumi amabili, 20, elithi lizazifeza njengohulumende phakathi kwensuku ezilikhulu zakuqala nxa lithe lavotelwa kukhetho oluzayo langena embusweni.
Izinto lezi zigoqela ukukhulula bonke ababotshwe ngezizatho zombusazwe abafana loMnu Job Sikhala lokumisa ukusetshenziswa kwedola leZimbabwe ngenxa yokulahlekelwa kwalo luhlonzi.
I-CCC ithi njalo izakwesula imithetho emibi encindezela uzulu futhi ithuthukise ezemfundo ngokusungula inhlelo ezintsha ezigoqela ukwesula uhlelo lweCALA, lona olubikwa luthwalise abafundi gadalala.
Lokhu kumunyethwe kugwalo lomhlahlandlela we-manifesto owethulwe ngumkhokheli weCCC uMnu Nelson Chamisa koBulawayo ngoLwesibili.
Ingcwethi kwezombusazwe futhi efundisa eWits University kweleSouth Africa uDr Jethro Mpofu utshele iStudio 7 ukuthi lanxa kuncomeka okukhulunywa yiCCC, umsebenzi wokukufeza unzima ngenxa yokugxila kombuso omubi athi ukhona okwamanje.
Your browser doesn’t support HTML5
Ingxoxo loDr Jethro Mpofu
Ibandla leZanu PF lona lithi alisoze lethule ugwalo lwezithembiso zalo kuzulu, i-manifesto ngoba imisebenzi enziwe nguhulumende walo eminyakeni emihlanu edluleyo iyazikhulumela.