Umkhokheli weCCC uMnu Nelson Chamisa wethule ugwalo lomhlahlandlela ozalandelwa nguhulumende webandla lakhe alubana lithe lanqoba kukhetho, i-manifesto, wathembisa uzulu izinto ezimqoka ezigoqela ukuvuselela umnotho, ukusungula imisebenzi, ukuthuthukisa impilo zabantu beZimbabwe kanye lokususa imisebenzi yokuphathwa kwenhlelo zikazulu ezidinga amaphepha eHarare eyisa eGweru lapho athi uzavula khona isigodlo esikhangelane lalumsebenzi, i-administrative capital ngesingisi.
Ugwalo lu luthi njalo phansi kukahulumende weCCC, abafundi abasoze babhadale imali yemfundo eprimary lase-secondary, ngitsho lemali yemihloliso ama-examination fees.
UChamisa uthembise njalo ukuthi uhulumende wakhe uzakhwezela izisebenzi iholo ukuthi ziphile kuhle.
Wengeze wathi uhulumende wakhe uzasungula inhlelo ezilohlonzi zokunakekela abantu abagogekileyo kanye lasebeluphele.
Ngakolunye uhlangothi, ibandla leZanu PF lona lithi alisoze lethule i-manifesto ngoba lisithi imisebenzi yalo yentuthuko elithi lizisungule eminyakeni emihlanu ephelileyo iyazikhulumela.
Sixoxe lohlaziya ezombusazwe njalo ekhokhela inhlanganiso elwela amalungelo oluntu eyeIbhetshu LikaZulu uMnu Mbuso Fuzwayo.
Your browser doesn’t support HTML5
Ingxoxo loMnu. Mbuso Fuzwayo.