UMnu. Nelson Chamisa, umkhokheli webandla leCitizens Coalition for Change ubesesilelweni sika Tinashe Chitsunga, owabulawa ngeviki ephelileyo ngabacatshangelwa ukuba ngamalunga ebandla leZanu PF.
Bekugcwele amalunga ebandla leCCC, izihlobo labangane esililweni lesi eHarare.
UChamisa uthe abantu badabuke inhliziyo ngokubulawa kuka Chitsunga.
UMnu. Nelson Chamisa umdeni kaTinashe Chitsunga
Omunye wabakubandla leli, uNkosazana Nonhlanhla Mlotshwa, uthi eleZimbabwe lilahlekelwe liqhawe lamaqhawe.
Uthi akumelanga abantu befele ukusekela amabandla abo.
UMnu. Mlungisi Moyo, olwela ilungelo likazulu, uyakusekela lokhu.
Kusenjalo, uNkosikazi Molly Phee, umsekeli ophethe uhlangothi kuhulumende weMelika obona ngokudlelana lamazwe ezwekazi leAfrica, utshele uBlessing Zulu weStudio 7 ukuthi kukhanya engani kalusoze luqhutshwe kahle ukhetho lonyaka eZimbabwe.
Kubikwa ukuba kulabantu abanengi abakumabandla aphikisayo, ikakhulu emaphandleni, abathi bakhahlanyezwa ngamalunga eZanu PF ngezikhathi kulungiselelwa ukhetho oluzaqhutshwa mhlaka 23 Ncwabakazi