Umsekeli kamongameli webandla leZanu PF, uMnu. Kembo Mohadi, usekhuze abasekeli bebandla elibusayo eMatabeleland South ngokungavoteli uMongameli Emmerson Mnangagwa ngobunengi kukhetho olwadlulayo.
UMohadi uthi inengi lakhabela ibhola ehlathini ngoba amakhansila kanye labameli bedale lephalamende bathola amavoti amanengi okwedlula uMnangagwa kukhetho olwadlulayo.
Uphinde wathi abantu kumele bevotele uMnangagwa lebandla leZanu PF esithi kunengi okwenziwe nguhulumende selokhu uMnangagwa wangena esikhundleni.
Zimbabwe Elections. (Photo: Albert Ncube)
Ekhuluma enkundleni yePhelandaba Stadium eGwanda namuhla emini, uMohadi uthe okwenzeka kukhetho luka 2018 akumelanga kuphinde kwenzakala lonyaka.
"Akula muntu othi votelani mina uPresident lizazibonela, lokhuyana okwenzaka ngo2018 ikakhulu ngapha eMatabeleland South singakuphindi lokhuyana ukuthi uyathola uMP elamavoti amanengi kuloPresident uyabe usitshoni kutsho uyabe ukhuluma okungalunganga ngomongameli so asikufuni khonokho akuphele khonokho."
Zimbabwe Elections. (Photo: Albert Ncube)
UMohadi uthi kulentuthuko ekhanyayo eMatabeleland South phansi kombuso kaMnangagwa, okugoqela ukuvuselela izivande zokulima ngokuthelezela, ukwakhiwa kakutsha komngcele weBeitbridge kanye lokulungiswa kwemigwaqo.
"Sithanda ukuthi simkhethe aqhubekele phambili eqedisa inhlelo zakhe elizaziyo, sifuna ukuwina okuzayenza izitha zethu ziswele ukuthi zizakuthini."
Umgcinisihlalo webandla leZanu PF eMatabeleland South, uMnu. Mangaliso Ndlovu, ukhuthaze abasekeli bebandla lakhe ukuthi bakhankase ngokuthula.
SEE ALSO:
Udaba Esilwethulelwe NguAlbert Ncube