VICTORIA FALLS - Amabutho abona ngezokulondolozwa kwemvelo, ama-game rangers, ngoMvulo abethokozela usuku lokunanza imisebenzi yabo olwe World Rangers Day ngesikhathi kulabanye babo ababulawa ngabadinga okungekho emthethweni impondo zendlovu kumbe ezikabhejane, inkakha lokunye.
Bexoxisana lomsakazo lo, babike ukuba kuyimvana ukudinana mathupha labazingela ngokungekho emthethweni, ama poachers, begadle inkafula kufa abayithwala ukubulala loba yini, njalo inhlanganiso ye Re-Wild ichaza ukuba inengi lifela ezandleni zalaba.
Omunye wabakhalayo nguMnumzana Amos Gwema, osebenza kuhlangothi lweZimbabwe Parks and Wildlife Management Authority esabelweni se Matabeleland North.
Abavikela inyamazana zendle
“Inengi lethu liyafa ngemva kokutshiya umsebenzi ngesizatho sokuthi bayabe bephazamisekile ngokuswela izinto ezidingakalayo empilweni yomuntu okufana lezindlu, ukukhokhela abantwana imali yezikolo, ukudla ngakho sikhalaza kuhulumende lenhlanganiso ezinye ukuthi zikhangelisise impilo yebutho leli.”
UNkosikazi Nonhlanhla Ndlovu, odabuka eMabale, uthi wakhetha ukwenza lumsebenzi ngomnyaka ka2015 ngemva kokubulawa kweganyana esigabeni sakhe.
Uthi induna yalumango uNelukoba yabiza umhlangano wokumanyana labe Zimparks lePainted Dog Conservation kwaphunywa ijumo kukhitshwa imijibila eyayisiqede inyamazana ezinengi emngceleni weHwange National Park.
“Sihamba ekuseni kumbe imini kusiyangokuthi thina njengeqembu kuyini esikubonileyo, ukuhamba kwethu kuyabe kusenziwa yikuthi kuyabe kukhona esikhubonileyo egangeni okungahambi kuhle kodwa ekuhambeni lapha kubuhlungu ngoba iganga lethu lilendlovu kwesinye isikhathi liyagijima omunye aze alimale libalekela indlovu.”
Kunanzwa usuku lweWorld Game Rangers Day
UMnumzana Fanuel Ncube, odabuka emangweni weDopota, uthi wakhetha ukwelusa inyamazana zendle ngemva kokunanzelela izinga ezibulawa ngalo.
“Isinqumo esenza ukuthi ngingene kuloluhlelo yikuthi esigabeni salahlekelwa yizifuyo ezinengi kanye lenkomo njalo lezemvelo sabona ukuthi zizatshabalala esigabeni nxa kuyikuthi kungasalondolozwanga kudwa uhlupho oselukhona yikuthi sekulenzondwano kulaba abathiyayo lathi esisebenzayo ngoba sebesithembisa ukuthi bengasitshaya nxa bethole ingoda zabo zikhitshiwe.”
UMnumzana Ronnie Sibanda, usomlomo wenhlanganiso yePainted Dog Conservation, uthi unzima lumsebenzi.
“Okokuqala sikhuluma ngomuntu ongena engangeni okulenyamazana eziyingozi ehamba ngenyawo elandela lapho okulemijibila, zona inyamazana ngokwazi ziyingozi ngoba abanye bayafa besemsebenzini.”
USibanda uthi kusukela eminyakeni embalwa edluleyo, sebethungathe bathola imijibila edlula inkulungwane ezingamatshumi amahlanu, okuyikho osekusindise inyamazana zendle ezinengi ezifana lamaganyana.
Abenhlanganiso ye Re-Wild babika ukuba kumnyaka ophelileyo, kwafa abalikhulu lengxenye -150, abane babo bengabe Zimbabwe. Bengeze njalo ukuba kusukela ngomnyaka ka 2006, sekufe abedlula kancane inkungwane lengexenye -1,600 emhlabeni wonke jikelelele, ikakhulu kwele Congo.