HARARE - Ibandla leMDC-T, elikhokhelwa nguMnu. Douglas Mwonzora, lithi kuzasetshenziswa idollar leMelika lingavotelwa nguzulu kukhetho olukhulu oluzayo.
UMwonzora ukhulume lokhu namuhla eHarare ngesikhathi kusethulelwa uzulu ugwalo lweziqondiso zalokhu abazakwenzela abantu bengavotelwa kukhetho oluzaqhutshwa mhlaka 23 Ncwabakazi. Uthe bazalwisana lobukhohlakali obubisela muva eleZimbabwe. Uthi akulankokheli elothando lozulu okwedlula yena labanye bakhe.
“Ukhetho lolu silwenzela uzulu weZimbabwe. Asilwenzeli abantu abasembusweni. Ukhetho lolu ngolukuthuthukisa impilo kazulu. Abantu beZimbabwe basebunzimeni. Abanengi kabakwazi ukuba bazakudlani kusasa. Izisebenzi zithwele nzima. Sizakuqeda lokhu."
UNkosazana Lwazi Sibanda, umsekeli webandla leMDC-T obesemhlanganweni lo okwethulwe khona i-Election Manifesto yebandla leli, uthakazelela okumunyethwe kugwalo lolu njalo lokwethulwe nguMwonzora.
MDC-T Manifesto Launch
“UMongameli ukhulume amazwi akhayo. Uthe iMDC ayilo bandla lodlakela. Libandla elifuna ukuba kume lokuthula elizweni abantu bangene kukhetho ngokuzwanana."
Ugwalo lweMDC-T Election Manifesto lumumethe okunye njalo abathi kuzanceda uzulu, okunjengokuba lemfundo engahlawulelwa ngabantwana besikolo, ukuvuselela ezokulima lokunye. Ingcwethi kwezombusazwe ezimeleyo, uMnu. Xavier Nyambo, uthi kumele amabandla ezombusazwe ethembise uzulu alakho ukukwenzela abantu hatshi ukuqamba amanga.
Kusenjalo, umkhokheli webandla leCitizens Coalition for Change, uMnu. Nelson Chamisa, ubesemhlanganweni omkhulu eChinhoyi namuhla lapho abekhankasela khona ukhetho olukhulu oluzayo. UChamisa utshele abasemhlanganweni lo ukuthi eleZimbabwe lidlelana ngendlela ephansi leleRussia elahlasela eleUkraine.
Amalunga ebandla leCCC
Umsekeli wesikhulumeli seCCC, uMnu. Felix Magalela Mafa Sibanda, utshele iStudio 7 ukuba uChamisa uqhubekela phambili ngokukhankasela ukhetho kungelani lendubo abahlangana lazo.
Kudaba olufanayo, uMongameli Emmerson Mnangagwa, ubesesigabeni seBinga namuhla lapho avule okusemthethweni inkampani emba amalahle eyeMuchesu Mine, elabaqondisi beContango Holdings labanye abadabuka eZimbabwe.
UMnangagwa uthi inkampani le ilakho ukwemba amalahle amanengi azakwenza eleZimbabwe lithole imali yakwamanye amazwe, ikakhulu idollar leMelika.
UMongameli Emmerson Mnangagwa labanye abahambe emhlanganweni omkhulu eNkayi wokukhankasela ukhetho oluzayo
Uphinde wathi inkampani le isivulele amathuba emisebenzi abantu abedlula amatshumi ayisithupha lanhlanu ekhulwini – 65 percent, abadabuka eBinga.
Ilunga leZANU PF Central Committee, uMnu. Mabutho Moyo, uthi okwenziwa nguMnangagwa kuthakazelelwa ngabantu abanengi eZimbabwe.
Akhankasa ngamandla lamanye amabandla elizweni lonke jikelele loba kulemibiko ethi kulabanye abatshaywa ngabakubandla leZanu PF. Ibandla elibusayo liyakuphika lokhu.
SEE ALSO:
Udaba Esilwethulelwe NguMlondolozi Ndlovu