NKAYI - Inkulungwane lenkulungwane zabalandeli bebandla leZanu-PF namuhla bahambe emhlanganweni webandla leZanu PF eNkayi lapho uMongameli Emmerson Mnangagwa othembise abantu izulu lomhlaba engabiselwa esikhundleni sikamongameli mhlaka 23 Ncwabakazi.
Bebehlabela, begida njalo besidla ezifela emlonyeni emhlanganweni webandla leZanu PF owokukhakhansela ukhetho olukhulu oluzayo. UMnangagwa, obekhatshwe ngumsekeli wakhe, uMnu. Constantino Chiwenga, amalunga eZanu PF alezikhundla eMatabeleland kanye lezinye izabelo, owayengumsekeli wakhe, uMnu. Phelekezela Mphoko, labanye, unike inkokheli zomdabu imbuzi. UNika izikolo ezintathu ama-computers okuthuthukisa izifundo esigabeni lesi.
UMnangagwa uqale ngokubonga abantu beNkayi ngokumsekela wahaya abadabula isizwe saMaNdebele lamakhosi akhona ukuthi baziqhenye ngesizwe sabo.
Abantu abasemhlanganweni webandla leZanu PF eNkayi
“Ngifunukuthi ngithi mina kunkosi ezahambayo uMzilikazi lenkosi uLobhengula, khangela abantwana bakho bakhonapha namuhla sibambe siqhuba phambili sisonke.”
Uthe eleZimbabwe lizaqhubekela phambili ngentuthuko lanxa lafakelwa izijeziso zenotho ngamazwe entshonalanga.
“Kuthuthukise ilizwe lethu, ngawonanalawa amaresources esilawo elizweni and ngesikhathi esidlulileyo kubonakale intuthuko isukuma okumangalisayo elizweni ngesibanga esedlula 5%.”
Abanye abahambe emhlanganweni webandla leZanu PF eNkayi
UMnangagwa uthe uhulumende wakhe wagebha idamu elikhulu lokuqeda uhlupho lwamanzi eMatabeleland North lakoBulawayo eleGwayi-Shangani Dam kunye lokwakha isitishi esikhulu sika gesi eseHwange Unit 7 and 8 ngakho-ke amagesi kasahluphi.
Utshele umbuthano lo ukuthi uzagebha izikotsho zamanzi kuzigaba ngezigaba zelizwe lonke, wathembisa lokulungisa umgwaqo osuka koBulawayo usiya eNkayi leminye.
“Sizagebha ama borehole, ama solar powered borehole every village not ukukotshoza bakithi.”
UMnu. Richard Moyo, umgcinisihlalo webandla webandla leZanu-PF esabelweni seMatabeleland North, uthi ibandla leli lizanqoba ngenxa yemisebenzi kaMnangagwa.
"Siyakuthembisa siyi Mat North ukuthi wasukumisa idamu elasehlule amadoda lamadoda since 1912 amakhiwa wabuya umbuso wamakhiwa waze wadlula but wena your excellence usulakhile idamu siyabamba amanzi."
Amalunga ebandla leCCC eMarondera ngeSonto
Abakhulumanga kangako ngogwaqo weNkayi-Bulawayo Road osugugudeke okumangalisayo. Uhulumende wehluleka ukulungisa umgwaqo lo oqakatheke kakhulu.
Kudaba olufanayo, uMnu. Nelson Chamisa ubesenkundleni yeRudhaka Stadium lapho atshele abantu ukuthi uzalungisa konke okubahluphayo.
“Sizimpendulo enkingeni zakulesisizwe. Siyisisombululo kuzindubo zethu. Siyisixazululo kukho konke okuhlukumezayo lokulikhathazayo. Sesibuyile thina siyi Cabinet elandelayo kulelilizwe, befuna bengafuni. Uyezwa besithi kuthwa akangengi angangena ujaha umhlabathi uyabuyela ,angangena ujaha omakorokoza liyathathelwa into zenu ,khululekani. Ungabona umuntu esithi awungeni uyazi ukuthi usungenile ,sokuzinkani ,uyakwazi ukuthi sengingenile. Angene yini ujaha? Angene yini ujaha?
UNkosikazi Sithokozile Chamisa, ikhosikazi lika Mnu. Nelson Chamisa usebemhlanganweni wokukhankasela ukhetho eMarondera.
Lokhu kusekelwa ngumkakhe, uNkosikazi Sithokozile Chamisa, ocele abantu ukuba bevotele uChamisa.
Ibandla leUnited Zimbabwe Alliance lalo lithi selikhankasela ukhetho ngamandla. UMfundisi Frank Mhlanga, umsekeli kamongameli walelibandla, uthi lanxa inkantolo yeHigh Court yathi angancintisi kukhetho bemethesa umlandu wokufaka amaphepha akhe isikhathi sokuvalwa kwe Nomination Court sesitshayile, uyakhankasa okuzwayo.
"Sibhizi asimanga uPresident wethu siyam khampeyinela nationally siyagijima izwe lonke jikelele ukuze umongameli wethu uPresident Elizabeth Valerio angene esikhundleni sokuba ngumongameli welizwe ukuthi siguqule yonke limthetho eindezela abantu amalungelo abo.
Ibandla leMthwakazi Republic Party lalo liyancintisa kukhetho. UMn.u Mqondisi Moyo ngumkhokheli walelibandla
Ibandla lenelisile ukufaka ama councillor kwelika Mthwakazi abafika i72, eBulilima eMangwe, ko Bulawayo bangu 18 lase Mat North. So, ke siyalicela ke Mthwakazi omuhle ukuthi xhasani ama candidates ethu awe Mthwakazi republic party.
NgoMvulo uMnangagwa wethekelela eBinga esiyakhankasela ukhetho oluzayo. Uzakuya leCowdray Park ngoLwesithathu.
SEE ALSO:
Udaba Esilwethulelwe NguEzra Tshisa Sibanda