HARARE — Iqula lomanyano wamazwe awezwekazi leEurope, elize eZimbabwe ukuzokhangela ukhetho lwalonyaka luqutshwa, ele European Union Election Observer Mission, lithi lizathumela iamanye amalunga alo emaphandleni, ngenjongo yokubona ukuthi ukhetho luka mhlaka 23 Ncwabakazi luqhutshwa ngokukhuthula kanye lokuthi lube ngolukhululekileyo.
Ekhuluma emhlanganweni lentathelizindaba eHarare umsekeli womholi wequla leli, uNkosikazi Bertha Martin-Rozumilowicz uthe balethemba lokuba ele Zimbabwe lizaqhuba ukhetho olukhululekileyo.
Uqhubeke ethi bazazama ukuba khona ezabelweni zonke zelizwe kungakhathalekile ukuthi kusemadhomobheni kumbe emaphandleni.
EU Zimbabwe Elections Observer Mission
"Kasisoze sibe emadolobheni kuphela. Sizabe sise ndaweni zonke. Siyabe sisemakhaya, siyabe sisendaweni zonke zelizwe"
Ingcitshi kwezombusazwe uMnu Tjenesani Ntungakwa uthi ukuba khona kwe EU elizweni kuzanceda ukuba ukhetho lukhululeke elizweni.
"Sibe kwazi ukuthi bekhipha uMugabe bathi bafuna ukuguqula izinto. Ukuba khona kwabo kutsho ukuba nxa beselizweni kuzenza ukhetho lwamukeleke"
Kodwa enye ingcitshi esebenza lenhlanganiso ye ZImbabwe Democracy Institute uMnu Bekezela Gumbo uthi ukuba khona kwabo elizweni akusoze kuguqule umumo oselizwe.
"Ukuba khona kwabo e ZImbabwe kuyafanana. Bona kaba moniti baya observer. Abalanguquko abazayenza kukhetho. UMongameli Mnangagwa uzakwenza akufunayo"
Abe EU bathi babheke ngelihlo lokhozi lokho okwenzakala emithethwandaba lapho amalunga amabandla aphikisayo alokhu ephikisa okuvinjwa kwawo ukuphatheka kukhetho lwalonyaka.
EU Zimbabwe Elections Observer Mission
Ukuza kwe EU e Zimbabwe kwenzakala ngesikhathi amabandla aphikisayo ekhala ngesimo esibi sombusazwe lapho athi akenelisi ukukhankasa ekhululekile amalunga amabandla la, eqhubeka esethuselwa ngezinye zezikhathi betshaywa kumbe ukubotshwa lokuhlukuluzwa ngamapholisa.
Abe EU bathi bazakhipha umbiko wabo ngokhetho lwalonyaka ngemva kwensuku ezimbili impumela yokhetho isiyethulwe.
Baphinde bathi bazakutsho okunengi ngokhetho ngemva kwamaviki amabili besithi kabasoze bakhulume ngokwenzakala elizweni ukhetho lungakedluli.
Inani lequla labe EU lokhuphuka ngamalunga afike kuliviki, amanye amalunga ezafika mhla wokhetho ukuze bacine sebelikhulu lamatshumi amahlanu-150.
Amazwe angaba ngamatshumi amabili lasikhombisa, akumanyano weEU, le asebenza leCanada, Norway, Switzerland lamanye ukuzobona ukhetho lweZimbabwe luqhutshwa.
Ngomnyaka ka2002, iZimbabwe yaxotsha owayengumholi wequla eleEU, eleza ukuzobona ukhetho luqhutshwa umnumzana Pierre Schori wakweleSweden, esetheswa umlandu wokungahloniphi ilizwe. Lokhu kwadala ukuthi i-EU icine isethesa izijeziso zenotho eyinye inkokheli kahulumende.
Ele Zimbabwe linxuse amazwe angamatshumi ayisithupha lane kanye labenhlanganiso ezizimeleyo aezimbalwa ukuzobona ukhetho luqhutshwa mhlaka 23 Ncwabakazi.
Your browser doesn’t support HTML5
Udaba lwabe EU Observers siluphiwa nguMlondolozi Ndlovu