HARARE - Idale leSupreme Court selivumelane lesinqumo sedale leHigh Court esokuthi uMnu. Saviour Kasukuwere akumelanga encintise kukhetho lukamongameli oluzaqhutshwa mhlaka 23 Ncwabakazi.
Lokhu kutsho ukuba uKasukuwere, obemcintisa ezimele, kasoze engene kukhetho lolu olulabantu abalitshumi lambili - 12. Okwamanje uselubhekise eConstitutional Court.
Abahluleli bomthethwandaba oweSupreme Court – uJustice Antonia Guvava, Justice Chinembiri Bhunu loJustice Felistus Chatukuta – bathe uKasukuwere ubengasoze aphumelele edale leli ngoba udaba lwakhe belungelasisindo.
UKasukuwere waphanyeka udaba lolu eSupreme Court kulandela isinqumo seHigh Court esakubeka sobala ukuba wephula iziqondiso zomthetho wokhetho kulandela ukuphanyeka amaphepha akhe eNomination Court ngoNhlangula lanxa waye sehlale phandle kwelizwe phose okwenyanga ezingamatshumi amabili – 18 months engafiki kwele Zimbabwe.
High Court Of Zimbabwe
UMnu. Lovedale Mangwana, owebandla leZanu PF, waphanyeka udaba lolu eHigh Court ephikisa ukungena kuka Kasukuwere kukhetho lukamongameli.
UNkosikazi Jacqueline Sande, omele uKasukuwere, utshele intathelizindaba eHarare ukuba badane kakhulu ngokwethulwe yiSupreme Court.
UNkosikazi Sande uthi sebezaphanyeka udaba lolu emthethwandaba weConstitutional Court.
Uphinde wathi kusobala ukuba ibandla leZANU PF kalifuni ukuba uKasukuwere ancintise kukhetho oluzayo. Abakubandla leZanu PF bayakuphika lokhu.
Kusenjalo, ibandla leCCC seliphanyeke kudale leSupreme Court udaba lokwalelwa kwamalunga alo alitshumi lambili ukuba bencintise kukhetho lwamalunga edale lephalamende koBulawayo.
Idale leHigh Court lithethe isinqumo lesi izolo kulandela okwaphanyekwa kulelodale yizizalwane zeZimbabwe ezithi kwakungamelanga abantu laba bencintise kukhetho lolu ngoba baphuza ukuphanyeka amaphepha abo eNomination Court.
UMnu. Gift Ostallos Siziba, umsekeli wesikhulumeli sebandla leCCC, uthi ibandla leZanu PF kalisoze lenelise ukubavimba ukuba bencintise kukhetho olukhulu oluzayo.
Kodwa uMnu. Mabutho Moyo, okudale leZanu PF Central Committee, uthi kabalani lodaba lweCCC loKasukuwere.
UNkosikazi Bertha Tshuma, ingcwethi kwezombusazwe osebenza eUniversity of Zimbabwe, uthi kukhanya engani alukhululekanga ukhetho oluzayo.
Kudaba olufanayo: Aqhubekela phambili amalungiselelo okhetho elizweni lonke kulokulwisana kubandla leCCC eMarondera lapho okulabantu ababili abathi bazancintisa kukhetho oluzayo lwamalunga edale lephalamende bemele ibandla leli.
UMnu. Caston Matewu loMnu. Misheck Manyere bathi bakhethwa ukuba bemele iCCC kukhetho oluzayo.