GABORONE - Bathabe okumangalisayo abadabuka eZimbabwe abahlala kwele Botswana asebezakwenelisa ukuba yizizalwane zakulelolizwe kulandela isinqumo somthethwandaba esikubeka sobalo ukuthi umuntu usevunyelwa ukuba yisizalwane samazwe amabili.
Umthethwandaba waphezulu oweHigh Court kwele Botswana wanquma nyakenye ukuthi eleBotswana kumele livumele ukuthi izizalwane zalo zibe le-dual icitizenship. Kodwa eleBotswana lakuphikisa lokhu laphanyeka udaba lolu emthethwandaba ophezulu oweCourt of Appeal.
Abamele eleBotswana basanda kwethula umbiko othi kabasaqhubekeli phambili ngodaba lolu. Lokhu kutsho ukuthi okwethulwa ngumthethwandaba weHigh Court ngomnyaka ka2022 sokumele kusebenze elizweni. Lokhu kube zindaba ezimnandi lakwabadabuka eZimbabwe abahlala kwele Botswana, ikakhulu abalemuli lezizalwane zeBotswana.
Isinqumo esitsha sitsho ukuthi akuselasidingo sokuthi uma oweZimbabwe efuna amaphepha awokuba ngowakwele Botswana, ahlanekele ukuba ngoweZimbabwe njalo abantwana abalabazali abadabuka emazweni amabili atshiyeneyo akuselasidingo sokuthi bakhethe ilizwe elilodwa uma besenelisa iminyaka engamatshumi amabili lanye (21).
UMnunzana Titus Nxumalo, olemuli lesizalwane seBotswana, uyamukele ngenjabulo inyathela elitsha phezu kodaba lwe dual citizenship.
“Lokhu kutshengisela ukuthi uhulumende weBotswana uyazwela abantu, ngoba besivele sikhathazeka ukuthi uma ulahlekelwa yicitizenship yelizwe lakho lomdabu ungathi ulahlekelwa ngeyinye ingxenye yakho.”
Uqhubuke esithi njalo kibo abafuna ukuntshintsha amaphepha kutsho ukuthi akusoke kube lezidingo zokungena emahofisini atshiyeneyo kudingwa usizo.
“Izithupha zami angingeke ngazilahle kanye lebantwaneni ngoba besisaba lomsebenzi omnengi ekuntshintsheni amaphepha, abanye baze bafe bengawaqedanga.”
UNkosazana Sindiso Sibanda, isizalwane seZimbabwe kodwa eselimnyaka eminengi ephila kwele Botswana, uthi inyathela le-dual citizenship liqondile ikakhulu kukhangelwe abantwana.
“Ngilabantwana ababili, bazalelwe lapha. Lokhu kubapha ithuba lokuthi bazikhethele phakathi kwamazwe womabili. Kungatshintsha into zihambe kuhle kweleZimbabwe balakho ukuyahlala khona.”
UMnunzana Ntokozo Thebe, olemuli kwele Botswana njalo laye njengabanye bakhe abeZimbabwe, uthi lokhu kuhle kakhulu ukuvumela idual citizenship.
“Uma uhulumende esithi abantwana bangavunyelwa ukuba le dual citizenship, kungasiza ukuthi uma efuna ukubuyela eZimbabwe engabi lohlupho, kube lula kuye, kungadingakali amaphepha amanengi.”
Okunhlanganiso yeZimbabwe Community kwele Botswana, uMnunzana Cephas Tshuma, uthi indaba ye-dual citizenship ibuye ngesikhathi esiqondileyo.
“Yindaba enhle ngoba silabanengi asebethethe kumbe bethethwe lapha kodwa befisa ukuphila ndawo zonke. Abantwana labo bayafisa ukuphila ndawo zonke, kodwa kuba nzima ukuthi bakhethe.”
Ommela iZimbabwe kwele Botswana, uMnunzana Henry Mukonoweshuro, ubonga okwenziwe ngele Botswana esithi kungenela lokwenziwa yiZimbabwe ngaphansi kwesisekelo esitsha sika 2013.
“Lokhu kutsho ukuthi abalabantwana abazalwa lapha abasoke bathwale nzima ngokugijima bezama ukuntshintsha amaphepha, ngitsho labazali abafuna ukuba ngabalapha sekuzakuba lula kibo.”
EleZimbabwe lalo liyavumela ukuthi umuntu abe le-dual citizenship. Lokhu kumunyethwe kusisekelo sombuso esalotshwa ngomnyaka ka2013.
Ngenxa yokungahlaliseki kwesimo somnotho eZimbabwe, inengi eliphuma phandle kwelizwe licina liyakhe imizi, njalo lathatha amaphepha awokuba yizizalwane zamazwe afana leBotswana, South Africa, Bhilithane, Melika kanye lamanye.