VICTORIA FALLS - Ababaza izithombe ezenziwa ngezigodo labalolonga ezamatshe eVictoria Falls bakhala ngokuncipha kwamathuba okuthengisa abakubazayo, osokusenziwa ngama wotela labanye edolobheni leli.
Bathi kabatholi kahle imali loba imitshina yabo ikhala kusukela liphuma lize liyetshona ngesizatho sokuthwaliswa amagabha avuzayo ngamawotela athenga ethengisa izithombe zenyamazama zasendle lokunye.
UMnumzana Ellingworlth Mpofu, obazela koNgqondongqondo, uthi kumele amabhizimusi la abelane okokwenza ngesimo sokuba labo bayalidinga idola leMelika.
“Thina sifun’ abantu abavela le, yibo abantu abathenga kakhulu izinto ngakho nxa kunje abantu labana abasabuyi ngendlela lebhizimusi iyayehla.”
UMnu. Ellingworlth Mpofu
UNkosikazi Susan Nyathi, ongumsekeli womngcinisihlalo wenhlanganiso yeZambezi Arts and Craft Women’s Market, uthi izithombe lezi sezitholakala ngitsho lasendaweni ezinengi emfuleni uZambezi kanye leVictoria Falls International Airport. Uthi izethekeli zihle zithenge khonapho hatshi kubo.
“Phakathi kwethu kulabafelokazi abanye kabayendanga, abanye bayagula izifo ezifana le HIV, ama BP ngakho uyabe usukhangelele ukuthi nxa uthe wathengisa uyethenga amaphilisi wonalawo ngakho besifisa ukuthi abemawoteleni lathi sithole ithuba lokuthi sithengise njalo abanye balabobaba kodwa ngomnotho lo ophansi welizwe akuselakuthi baba.”
Amazwi akhe agcizelelwe nguNkosikazi Nozwelo Moyo, othi ibhizimusi kayisafani.
“Indaba yiyo yonaleyo ukuthi wonke amawotela kususekela e airport sekuyisikiriyosi abasadili ngokwabo njalo kabasatshelwa luthi ngendaba ye curio market.”
UMnumzana Trymore Ndolo, ongumnginisihlalo wenhlanganiso yeSinathankau Curio Market, uthi sebekhamekile, njalo ukubazwa kwalezizithombe kuqukethe isiko asebesesabela ukuthi lingalahleka.
Trymore Ndolo
“Ngoba nxa sikhuluma ngezizalwane zalapha lokuvikelwa kwazo, yibo abantu abakwanisa ukuxoxisana lezethekeli zalapha ngoba ma engasowalapha uzakhulumani lomuntuwzini. Uzamtshelani ngendawo yalapha ngoba nxa sikhuluma ngendawo le siyabe sikhuluma ngabantu abatholakala kubo Shana, eJambezi abayibo abeHwange.”
UMnumzana Nguquko Tshili laye okulo umkambo uthi bandonsa nzima kubhizimusi leli.
“Abantu bonke ngobugovu abasondelelane lama directors of companies bonke sebesebenzisa ubugovu bonobuyana bafaka amashops endaweni zonke emawoteleni, kubo nationals parks amakhiwa ukuze aze afike emarket sekuyilapha lalaphana, sekuyigqo.”
Nguquko Tshili
Bathi njalo okubadidayo yikuthi amawotela la kawathengi izithombe lezi lakibo kumbe abanye ababazi bakulumango, okuyikho okwenza bengazwanani. Ephendula izikhalazo lezi, uMnumzana Clement Mukwasi, ongumongameli wenhlanganiso yeEmployers Association for Tours and Safari Operators, uthi impikiswano le kufuze itshukelwe ebandla.
“Kumele sihlale phansi sibonisane ukuthi singasebenza njani lokudlela kwethu ukuthi singakuthuthukisa njani ngoba sonkeni kufuze sithole inzuzo ngoba bonalaba labo ngama downstream operators.”
Sinathankau Curio Market
UMnumzana Kelvin Moyo, ongumngcinisihlalo wenhlanganiso yeVictoria Falls Combined Residents Association, uthi baphezu kwaloludaba.
“ECapetown bayabelana leliqebelengwane kuhle kulama divisions athile, lathi siyakulungisa njengezakhamzi, sizakhuluma le business community ekhona kutourism ukuze bekuzwisise ukuthi hatshi yikho lapho izakhamizi lazo ezikhangelele khona ukuthi bethole ukuphila.”
Abekhansili yalelidolobho bathi isithupha sokuthengisa ngokusemthethweni kasikhethi ukuthi umuntu engenzela ngaphi ibhizimusi yakhe.Kuphenyo olwenziwa ngabe African Journal of Hospitality, Tourism and Leisure phambi kokuqhamuka kobhubhane lweCovid-19 ngo2020 bakika ukuba abasemsebenzini wokuthengisa okubaziweyo kuleli, bathengisa izithombe zentengo ezifika izigidi ezilitshumi lengxenye zamadola eMelika -10. 5 miilion, ezinengi zisiya kwele Melika lase Europe.
Kodwa izakhamizi lezi zithi impilo yazo kayihambisani lesilinganiso lesi.