HARARE - Uhulumende weZimbabwe uthi amabandla aphikisayo ayala ukukhuluma emsakazweni kazulu loba nje ephiwa ithuba lokukhankasela ukhetho olukhulu oluzayo. Kodwa abamandla aphikisayo ayakulandula lokhu.
Lokhu kuphume emhlanganweni eHarare ongenwe ngabazahlolisisa ukhetho olukhulu oluzaqhutshwa mhlaka 23 Ncwabakazi leziphathamandla zikahulumende. Uhulumende uthi kuzakuba lokhetho olukhululekileyo lonyaka.
UMnu. Kindness Paradza, umsekeli womphathintambo kahulumende obona ngokwethulwa kwemibiko, utshele abasemhlanganweni lo ukuba amabandla aphikisayo atshedela muva uma enikwe ithuba ngumsakazo weZBC leminye edlelana lohulumende ukuba bekhulume lozulu.
"IZBC iyenelisa ukusakaza imihlangano yonke, kodwa kumele sincedakale ngezimota ukukwenza lokhu. Isuka ibe minengi limihlangano."
Kukhulunywe njalo emhlanganweni lo ngokuvinjwa kwemihlangano yamabandla eyokukhankasela ukhetho oluzayo evinjwa ngamapholisa. Abaphikisayo bakhala ngokuthi amapholisa labanye abezomthetho bavimba imihlangano yabo mahlayana.
UMnu. Gerald Gwinji, umabhalane ophethe uhlangothi luka hulumende lwendaba zekhaya, uthe amapholisa kawakhethi bandla ekuvimbeni imihlangano engekho emthethweni.
Foreign election observers in Zimbabwe
"Amapholisa asethole incwadi ezifika 1,437 zisuka kuZanu PF, kulezi ncwadi, ezingu 1,351 zazihambelana lomthetho kuthi ezingu 86 zazingahambelani lomthetho, okwenza imihlangano le ingenziwa. ICCC yaletha incwadi ezifika 410 kuthi ezingu 345 zazihambelana lomthetho kuthi ezingu 65 zazingahambelani lomthetho."
UGwinji uthi ibandla leMDC-T selivunyelwe imihlangano engamatshumi amabili lantathu- 23 phakathi kwemihlangano engamtshumi amathathu - 30.
Uthe umumo oselizweni ukhululekile njalo ukhetho lwalonyaka luzabe lukhululekile.
Kodwa uMnu. Gift Ostallos Siziba, umsekeli wesikhulumeli sebandla leCitizens Coalition for Change elikhokhelwa nguMnu. Nelson Chamisa, uthi ngamanga aluhlaza tshoko okukhulunywa yiziphathamandla zikahulumende.
"Sikhuthaza iZBC, iHerald leZimpapers ukuba basebenze okusemthethweni. Ungakhangela esikhathini bayabuya kuma rally ethu bethathe imfanekiso imhlangano ingakaqali. Lokhu kungamanga amakhulu."
UMnu. Brian Barrack Ncube, umsekeli wesikhulumeli sebandla leZAPU, uyakusekela lokhu.
"Baqamba amanga aluhlaza tshoko ukuba banikeza amabandla aphikisayo ukuba siyathola amathuba lokuba ukhetho lolukuthula. Siyabala imihla lamalanga ukuba abantu bayethuselwa betshaywa emakhaya."
Foreign observers in Zimbabwe
Ingcwethi kwezombusazwe, uMnu. Tjenesani Ntungakwa, uthi ukubakhona kwalabo abacubungula ukhetho kutsho ukuthi ukhetho oluzayo lalakho ukukhululeka.
“Bathi bekhipha uMugabe bathi sekule second republic. Ukubakhona kwama observers kufana lokuba khona kukanompembe. Asazi ukuba unompembe lo uzakubona njani."
Abangene umhlangano eHarare ngoMvulo bekunhlanganiso ezigoqela eyeSouthern African Development Community, European Union leAfrican Union lezinye.
Omunye wabangene umhlangano lo nguMnu. Mwayiwawo Polepole.
“Mina ngithabe kakhulu ukubona okunengi okwenzakalayo. Singakhangela okukhona kuhambelana lalokho okutshiwo ngumongameli ukuba ukhetho luzabe lukhululekile."
Kusenjalo, kuqhubekela phambili ukuthoniswa kwendaba ezimbalwa emithethwandaba koBulawayo leHarare ehambelana lezokhetho.
Kukhangelelwe ukuba ngoLwesithathu kuzakwethulwa okumayelana lodaba lokuzama ukumisa abakubandla leCCC abancintisa kukhetho lwamalunga edale lephalamende koBulawayo.
ICCC layo ifuna iZimbabwe Electoral Commission ukuba ithathe amagama abafisa ukungena kukhansili yesabelo lesi.
EHarare, uNkosazana Linda Masarira uzama ukuba igama lingene kulabo abazancintisa ukhetho olukamongameli kulandela ukwala kweZEC ukwamukela amaphepha akhe eNomination Court.
IZEC ithi amacala wonke la enza ukuba yehluleke ukulungisa amaphepha okuvota – amaballot papers.