GWANDA - Abafundi beMatebeleland South, abafika phose amakhulu amane babikwa sebetshiye isikolo kusukela ngoZibandlela kusiya kuNhlangula lonyaka ngezizatho ezitshiyeneyo ezigoqela ukuzithwala lokwenda.Inengi abafundi laba ngabasemaphandleni eInsiza laseMangwe.
Umbiko owethulwe ngabogatsha lwezemfundo eZansi yemaNdebeleni uveza ukuba ukuzithwala kwabafundi, ukwendiswa bebancane, ukuswelakala kwemali lokunye, ngokunye osekudale ukuthi abafundi befulathele isikolo.
Abafundi abangamatshumi amahlanu lantathu 53 ngakade bezithwele ukuthi abalitshumi ngabatshiye isikolo besiyakwenda.
UNkosikazi Thando Mauba ongumsekeli kanobhala jikelele wenhlanganiso yababalisi eye Educators Union of Zimbabwe uthi lanxa umthetho uvuma ukuthi abafundi abazithweleyo baqhubeke ngezemfundo inengi kaliphindi liye esikolo ngemva kokukhulelwa.
Gwanda school dropouts
"Inani labantwana abatshiya isikolo ngethemu ngethemu liyaqansa, amankazana ikakhulu ayabe sezithwele, uhulumende uvumile ukuthi labantwana abazithweleyo babuyele ezikolo kodwa mina ngokwami angikamboni umntwana ohamba esikolo sezithwele."
Uqhubeke ethi ingxenye yabafundi laba asebetshiye isikolo ikakhulu abangabafana ngasebekhulelwa yizidakamizwa.
"Abafana bayabe besiya eGoli kumbe besiya esitsheketsheni kwesinye isikhathi bezihlalele nje benatha amatshwala, isikhathi esinengi bayabe bebona isikolo sesibabambelela ngoba bayabe befuna ukubambabamba ukuze bathole imali yotshwala."
UMqondisi wenhlanganiso emela amalungelo abesifazana lamantombazana eyeWomen Development Association of Zimbabwe iWODAZ, uNkosikazi Sethekele Tshabangu uthi zinengi inswelo zabafundi bemaphandleni.
"Nxa sikhangele emaphandleni kujwayelekile ukuthi abantwana abangamankazana bacina bengaqedanga isikolo, abanye babo bacina bezithwele abanye bayemazweni abanye babaleke becina bezihlalisa labotsheketshe, abanye baswela amawunifomu abanye imali."
Gwanda school dropouts
Njengenhlanganiso uthi kukhona abakwenzayo ukuze laba bafundi babuyele esikolo.
"Sike saba lohlelo lokubisela abantwana esikolo I kakhulu nxa kuphela iCovid inengi labantwana alisabuyelanga esikolo, abanye babo babekulangazelela ukuya esikolo abanye wawubabona ukuthi bacabanga ukuthi impilo yabo siphelele emendweni."
Umbiko wogatsha lwezemfundo uveza njalo ukuthi abafundi abafika phose amatshumi ayisikhombisa 67 batshiye isikolo ngenxa yodubo lwemali.
UNkosikazi Gugulethu Mnkandhla umqondisi wenhlanganiso enakekela abantwana eyeLesego Memorial Trust uthi bayancedisa abafundi abaswelayo.
Gwanda school dropouts
"Sibabhadalele amaschool fees, abanye sibathengele amabhuku amawunifomu ukwenzela ukuthi kungabi lesizatho sokuthi umntwana angayi esikolo, siyakhulumisana labadala esigabeni sibakhumbuza ukuthi wonke umntwana ulelungelo lokuya esikolo njalo akumelanga ayendiswe. "
Kumaviki asanda kudlula abafundi besabelweni semaNdebeleni bakhale njalo ngemango emide abayihambayo lapho besiya esikolo besithi kuyadingeka ukuthi kwakhiwe ezinye izikolo ukuze abafundi baqhube izifundo zabo beseduzane lemakhaya abo.
Your browser doesn’t support HTML5
Ezemaphandleni liloAlbert Ncube