BULAWAYO - Umqeqetshi weqembu lenguqu eleHighlanders, uBaltemar Brito ukhuthaza abalandeli baleliqembu ukuba kababuye ngobunengi bezosekela leliqembu lona elidlala ngendlela ethembisa ukuba lonyaka lingaphakamisa isicoco seligi elacina ukusiphakamisa ngo2006.
New Highlanders coach Brito
Iqembu leHighlanders lizemukela eleManica Diamonds kusasa ngeSonto njalo uBrito uthi kuyisifiso sakhe ukuba abalandeli baleliqembu baze ngobunengi enkundleni ukuzolibukela.
“Siyabadinga abalandeli, siyalundinga usekelo lwabo. Akusikho ukuthi lumdlalo uqakathekile ukwedlula eminye kodwa esikufisayo yikuba batshengise usekelo lwabo ngokugcwalisa inkundla igcwale phamu,” kutsho uBrito.
Iqembu leHighlanders lizangena kumdlalo wakusasa lihlezi phezu kwengalane yemiklomelo lilemiklomelo engamatshumi amathathu lanye (31) njalo ukudlala kwalo sekulethe ithemba kubalandeli balo ukuba mhlawumbe lingaphamisa isicoco seligi sona elacina ukusithatha ngo2006.
Kumidlalo edlalwe namhla kusigaba seCastle Lager Premier Soccer League iqembu leGreen Fuel linqobe ele Dynamos nge 1 ka nya ngase Gibbo, iqembu leYadah linqotshwe nge 3 ka 1 ngeleChicken Inn ngaseBaobab, iqembu leCranborne Bullets linqotshwe nge 1 ka nya ngeleNgezi Platinum Stars eNyamhunga, iqembu leBulawayo Chiefs linqotshwe nge 2 ka 1 ngele leHerentals eLuveve, kuthi iqembu leCaps United libe ngutshiki lobhanqa 1 ka 1 leTriangle eBata.
Iqembu eliphakamise isicoco nyakenye eleFC Platinum lizavakatshela emalahleni ukuyadlala leqembu leHwange kusasa ngeSonto njalo umqeqetshi walo uNorman Mapeza uthi ukhangelele umdlalo onzima kakhulu.
“Siya eHwange njalo akusoze kube lula ngoba baqale bengadlali kuhle bedlala bengakibo kodwa khathesi sebedlala kuhle kakhulu. Okuqakathekileyo yikuba sihambe silenhloso eyokuba siyedlala kuhle ukuze siphenduke silempumela enhle,” kutsho uMapeza.
Eminye imidlalo yangeSonto izadlalwa ngokulandelayo.
Iqembu leSheasham lizadlala leleBlack Rhinos ngaseBata, kuthi iqembu leSimba Bhora lizadlala leleZPC Kariba ngaseBaobab.
Kusenjalo, umqeqetshi weqembu labesifazane elimela ilizwe leZimbabwe emdlalweni wokuqaga uRopafadzo Mutsauki uthi ukhangelele ukuba leliqembu lenze izimanga kumncintiswano wokudinga intshantshu zomhlaba ozaqhutshelwa elizweni leSouth Africa ensukwini ezilandelayo.
“Sikhangelele ukudlala sithole impumela enhle singapheleli kumidlalo yezibaya, nxa kusenza sibe kumaqembu amane ahamba phambili emhlabeni jikelele,” kutsho uMutsauki.
Umncintiswano weNetball World Cup uzaqhutshelwa edolobheni leCape Town elizweni leSouth Africa njalo uzaqala mhla zingamatshumi amabili lathoba minwe mbili kuyonale inyanga kaNtulikazi.
Iqembu leZimbabwe likusibaya sikaPool A ndawonye leAustralia, Tonga kanye leFiji. KuPool B kuleEngland, Malawi, Scotland kanye leBarbados. KuPool C kuleJamaica, South Africa, Sri Lanka leWales. KuPool D kuleNew Zealand, Trinidad and Tobago, Uganda kanye leSingapore.
Ngokwesibili ukuba ilizwe leZimbabwe liphatheke kumncintiswano wezizwe zomhlaba emdlalweni webhola lokuqaga elabesifazane njalo ngo2019 liphutshe lisendaweni yethoba minwe mbili emidlalweni eqhutshelwe kweleNgilandi.
Your browser doesn’t support HTML5
Ezemidlalo siloJoseph Njanji