VICTORIA FALLS - Izakhamizi zeVictoria Falls zithi sezidlela evalweni ngoba zesabela ingozi yokubamba imikhuhlane eyesihudo efana le-cholera ebhahe eZimbabwe.
Zithi amanzi ayasilela kulandela ukungasebenzi ngemfanelo kwempompi zokukha amanzi eziwadonsa emfuleni uZambezi.
Sokuzinyanga ezedlula ezine izakhamizi zalel’idolobho zikhala ngodubo lolu.
UNkosikazi Sithandazile Tshuma uthi abasifazane labantwana yibo abasengozini enkulu ngoba behlala bephuma ijumo ukuyadinga amanzi la.
“Siyaswela ukuthi singaflasha ngani, ukupheka sipheka nzima ngoba kuyabe kungelamanzi, lokugezisa imiganu kunzima itshona ihlalwa zimpukane ngoba kungela manzi ukuthi igeziswe. Abantwana sekulamalanga ukuthi lamuhla bayageza kusasa amanzi ayab’engekho bengagezi abantwana.”
Amazwi akhe agcizelelwe nguNkosikazi Christia Muzenda, ohlala eMfelandawonye, othi izambuzi kazisangeneki njalo lanxa umanisipala eyake ebakhumbule ngamanzi, kaweneli.
Victoria Falls resident
“Ibhawuza lakhona lingabuya futhi kasikwani. Siyalayinela kwesinye isikhathi uthole inkonxa ezimbili ngenxa yevigoroni eyabe ilapho njalo lenkonxa zakhona kazeneli ukugeza lokuwatsha sibuye siwanathe lamanzi lawo engafakwanga umuthi njalo lokulima kasisalimi ngoba kasilamanzi okuthelela. Sesisenelisa nje ukudinga okunatha nje kuphela njalo lokuwatsha sesihlala amaviki amabili kumbe amathathu singawatshanga lezambuzi njalo kazihlambulukanga ngumnuko ledoti kuphela.”
Okhubazekileyo uIsaya John Chipepura uthi uhlupho lolu lubuhlungu kakhulu kwabakhubazekileyo ngoba bengelandlela yokuya kukha amanzi.
“Isimanga yikuthi kuZambezi umfula useduzane, kodwa kuyini okusenza siswele amanzi, njalo mina njengomuntu okhubazekileyo ngithwelenzima kangikwanisi ukuthi ngiyekukha amanzi kwenyeindawo ngaphandle kokuthi ngiwathole empompini. Ukwalayinela kunzima ngoba liyabona ukuthi nginjani njalo ngiyabe ngizathwalanjani ngiphethe ama crutches kumbe ngiku wheelchair.”
UMnumzana Honest Bibita laye uthi kuyamdida ukuthi lindawo ihlale isikhathi eside kangaka ingelamanzi, njalo lokhu sekungokweminyaka phose yonke.
“Sifisa ukuthi ikhansili isenzele kuhle ngoba uZambezi useduzane, asiboni ukuthi kungabaluhlupho lokhu ukuthi siwathole ikakhulu khathesi uZambezi ugcwele kodwa asazi ukuthi uhlupho lungaphi kukhansili yethu.”
Ephendula phezu kwalimpica, uMnumzana Ronnie Dube ongungqongqotshe weVictoria Falls City Council, uthi udubo yikungasebenzi kwempompi edonsa amanzi emfuleni uZambezi esilesikhathi yafayo.
Isakhamuzi seVictoria Falls
“Silama pump akhona kodwa asefile sizama ukuthi sifake amanye amatsha.Okwakhathesi sifake ipump encane esenelisa ukuthi ithwale amanzi kodwa amanzi ewahambisayo aweneli. Kuzathatha isikhathi ngoba sifaka iconcrete entsha ehambelana le size yamapump esiwafakayo ngakho siyacela ukuthi abantu babekezele ngoba yikho okwenza amanzi engaphumi kuhle phakathi komuzi wethu.”
UMnumzana Kelvin Moyo, umngcinisihlalo wenhlangiso yeVictoria Falls Combined Residents Association, ukhuthaza ikhansile le ukuba ikwenze lokhu ngokutshetsha.
“Akumelanga kubelama issues afana lokuthi sekulomkhuhlane ofana labo cholera lamanye ahamba ngokuswelakala kwamanzi. Ikhansili kufuze ikuqakathekise lokhu ukwenzela ukuthi lendawo yethu le yezethekeli iqhubeke isibalezethekeli ngoba bengabakwazi ngalokhu abangeke besabuya njalo nxa bengasabuyanga imisebenzi izaphela.”
Udubo lwamanzi kulelidobhobho luza ngesikhathi eleZimbabwe libhekane lohlupho lwemikhuhlane yesihudo egoqela icholera esibhahile elizweni jikelele.
Indawo ezinengi zemadolobheni kazilamanzi okuyikho okubangela lumkhuhlane wohudo ukuthi uqhubeke umemetheka.
Uhulumende kuhlangothi lwezempilakahle lubike ukuba sekubanjwe abazinkulungwane ezedlula ikhulu – 131,000, belecholera njalo lumkhuhlane subulele abedlula amatshumi ayisithupha lokhe waqhamukayo ngenyanga kaZibandlela.
Abenhlangiso yeRelief Web kuphenyo lwabo abalwenze emavikini adluleyo bakhuthaze ukuba uhulumende kumele asabalalise ulwazi kuzulu ngalesisifo, njalo atholise uzulu amanzi ahlanzekileyo ukuze amelane lalesisifo.