HARARE - Ingcwethi kwezemithetho, amagqwetha amalungelo oluntu, uzulu lamabandla aphikisayo bathi umthetho omutsha oweCriminal Law (Codification and Reform) Amendment Act, loba iPatriotic Act, uzasetshenziswa ukwephula amalungelo oluntu.
Lokhu kuza ngesikhathi uMongameli Emmerson Mnangagwa esesayine iCriminal Law (Codification and Reform) Amendment Bill ibe ngumthetho welizwe ngesikhathi ilizwe lilungisela ukhetho.
Ingcwethi lezi zithi lumthetho wephula amalungelo oluntu ngendlela emangalisayo zisithi kawuhambelani lalokho okumunyethwe yisisekelo sombuso welizwe.
Eyinye yalezi ngcitshi elombono munye nguMnu. Lizwe Jamela, oliqgwetha elisebenza lenhlanganiso yeVeritas.
“Nxa sikhangele ngendaba yokhetho, nxa umuntu ekhankasa ulakho ukuthi sifuna uhulumende lowu ephume, ulakho ukucina usibotshiwe ngoba uyabe usuthiwa ulecala lokuphazamisa uhulumende.”
UJamela uqhubeke esithi lumthetho ulezijeziso eziphambana leminye imithetho enjengaleyo enika uzulu inkululeko yokutsho imibono yakhe, asole uhulumende nxa lapho ephosisile kungela kwesabela ukubotshwa loba ukujeziswa ngesigwebo sokulengiswa.
Umsekeli wesikhulumeli seCCC, uMnu. Felix Mafa, uthi lumthetho lo mubi esithi ulakho ukuba phazamisa emikhankasweni yabo njengebandla.
“Asomthetho ofakelwe abantu. Ngumthetho otshengisa ukuba iZANU isiphekelwe ngu mphako. Thina sizawucitsha masinyane nxa singanqoba.”
Lokhu kusekelwe yisikhulumeli seZAPU, uMnu. Msongelwa Ndlovu, othi imthetho enjengaleyi iyethusa.
“Umthetho ka Mnangagwa uyasethusa kakhulu njenge ZAPU. Ibe ikhona imthetho efana laleyi eyabekwa nguSmith iyasethusa kodwa ayisoze isimise. Sizaqhubeka sikhankasa sikhuluma iqiniso.”
IStudio 7 kayenelisanga ukuzwa imibono kampathintambo wezemithetho uMnumzana Ziyambi Ziyambi.
Kodwa ekhuluma ngemva kokupasiswa kwalumthetho edale leSenate, wathi lumthetho uqakathekile lakwezomvikela welizwe.
Ilunga leZANU PF ozamela ibandla leli eMpopoma Mzilikazi, uMnu. Admire Masikati, uthi akaboni okubi ngalumthetho.
“Kungumthetho omuhle kakhulu. Abantu abanengi abalathando ngelizwe labo. Ubuye ngesikhathi esihle ngoba uzakwenza abantu bathande ilizwe labo.”
Abatholakala belecala phansi kwalumthetho babikwa belakho ukugwetshelwa ugodo kumbe ukuhlala ejele okwesikhathi eside.
Umthetho lo uza ngesikhathi sokungase nsuku zatshwala ukuthi kuqhutshwe ukhetho lokudinga amakhansila, amalunga edale lephalamende lomongameli welizwe, ngenyanga ezayo kaNcwabakazi.