Intathelizindaba yeStudio 7 uAnnastacia Ndlovu uthi amapholisa ogatsha lwe Central Investigation Department i-CID amtshayele ucingo ngoLwesibili ebuzisisa ngokutshaywa kwakhe ngabaqajwa njengamalunga ebandla leZANU PF koBulawayo ababikwa bebexotsha abathengisa ezitaladini kulelodolobho abangayisibo bebandla labo izolo.
UNdlovu, uthi ulokhe esizwa ubuhlungu emzimbeni ngemva kokutshwaywa.
Isikhulumeli samapholisa uMnu. Paul Nyathi uthi basadingisisa ngaloludaba.
Sibuze umgcinisihlalo webandla leZANU PF koBulawayo uMnu. Jabulani Sibanda ngaloludaba wathi wonke umuntu kufanele alandele imithetho yekhansili, kodwa kasoze akhulume okunengi ngalo ngoba ephandle kwedolobho njalo engazisisi okwenzakeleyo.
Umsekeli ka mayor wedlobho lakoBulawayo uKhansila Mlandu Ncube ka ward 1 enzikini yedolobho uthi udaba lolu sebaluhlafuna emihlanganweni eminengi leziphathamandla zikahulumende labanye, ama stakeholders ngesiNgisi, kodwa abathengisayo laba, okusobala ukuthi abayisibo bezigaba zeMatabeleland, bayala ukusuka ezitaladini.
UNjabulo Ncube isiphathamandla senhlanganiso yeZimbabwe Editors’ Forum uthi kuyadanisa ukutshaywa kwentathelizindaba njengoba beqhube imihlangano lamaphosa labamabandla ezombusazwe, bavumelana ukuthi intathelizindaba zingahlukuluzwa. Uthi intathelizindaba zesifazana zimbalwa ngakho ukutshaywa kuka Annastacia kungenqabela amantombazana ukuthi afundele ukuba zintatheli. Ugcizelele wathi kufanele amapholisa abophe abadale lelicala.
Ezinye inhlanganiso ezilwela amalungelo entathelizindaba ezigoqela iZimbabwe Union of Journalists, i-MISA-ZIMBABWE, lezinye lazo sezisole kakhulu loludaba njalo zithi zizaphathisa ngendleko zokuthi uAnnastacia Ndlovu athole usizo lokuhlolwa emitshineni
Your browser doesn’t support HTML5
Lalela Loludaba Ngokugcweleyo