Amapholisa abikwa ephakathi kokuphenya isehlakalo lapho intathelizindaba yomsakazo weStudio 7 uAnnastacia Ndlovu etshaywe ngabacatshangelwa ukuthi ngabebandla leZANU PF koBulawayo abakade bexotsha abathengisa ezitaladini kulelidolobho abangayisibo bebandla labo.
UNdlovu uthi usebamangalele emapholiseni abamtshayileyo ngoba bayazakala njalo lanxa bemcitshise eminye imifanekiso yama videos kumakhalekhukhwini wakhe, eyinye etshengisa ubuso babo ilokhe ikhona futhi uwatshengise amapholisa njengobufakazi.
UNdlovu, obelezinye intathelizindaba lazo ezibikwa zitshayiwe kumbe zabaleka, utshele uSithandekile Mhlanga weStudio 7 ukuthi usebikele inhlanganiso ezilwela amalungelo entathelizindaba ngaloludaba ezibalisa i-MISA Zimbabwe le Zimbabwe Union of Journalists njalo ziyampathisa ngemali yokubhadala indleko zesibhedlela leyokuthi ayehlolwa umzimba kabanzi emitshineni.
Your browser doesn’t support HTML5
Ingxoxo loAnnahstacia Ndlovu.
Asenelisanga ukukhuluma leziphathamandla zebandla leZANU PF koBulwayo kumbe abanye abaphatheke kuloludaba kodwa ibandla leli lithi alibangeli udlakela ikakhulu ngalesi isikhathi sokulungiselela ukhetho ngenyanga ezayo njalo umkhokheli walo umongameli Emmerson Mnangagwa uhlezi egcizelela ukuthi kube lokuthula