HWANGE - Izakhamizi zeHwange West zikhuthaza abancintisa kukhetho oluzakwenziwa lonyaka eZimbabwe ukuba bethuthukise lindawo ngokwakha izikolo, ukutholisa uzulu amanzi ahlanzekileyo kanye lokubasiza esimeni sendlala ababhekane laso.
Zithi akumelanga bekukhohlwe lokhu benganqoba kukhetho oluzaqhutshwa mhlaka 23 Ncwabakazi kunyanga ezayo.
Osakhulayo uNkosikazi Rebecca Mpala, odabuka eMonde, uthi ngemva kokhetho ukubona kubalulekile ukuba inkokheli lezi ziphatheke ekwakhiweni kwezikolo eHwange ngoba inengi labo kalenelisi ukuqeqetsha ngokusweleka kwezikolo. Uthi lokhu yikho okwenza abatsha abanengi bethathe izidakamizwa kumbe betshade besesebancane.
“Okwenzakalayo yikuthi izikolo, ikakhulu iSecondary ikhatshana lapha ngakho abantwana bacina bevilapha ngoba umango wakhona mude kakhulu ukuthi beyefika khona. Abanye bacina sebesenda abangamankazana, abafana sebengabadakwayo, nje yona impilo inzima lapha eHwange siyacela lisincede ngesikolo sibeseduze abantwana befunde ngesikhathi esiyiso.”
UNkosikazi Ethel Mpofu, odabuka koMvuthu, uthi intuthuko yakulumango isezingeni eliphansi kakhulu.
UNkosikakzi Ethel Mpofu
“Siyacelisisa ukuthi kubelentuthuko phakathi kwesigaba sangakithi, kuyakhiwe isikolo esizakwenza ukuthi abantwana befunde ngoba lemfundo yangapha iphansi vele, angiboni ukuthi abantwana bengaphumelela besiyaphambili. Besicela uncedo kini kakhulu, lingene njalo kumaclinics, akhatshana kakhulu sihlezi labantu abadala abakhulileyo abala ma 70 years kusiya ku 90, kodwa engagula ebusuku kuyaswelakala itransport ukuthi umuntu ahambe eclinic.”
UMnumzana Amos Dube laye udane kakhulu ngokwenzakala esigabeni lesi.
“Akulakudla njalo eyinye indaba esiyikhalela kakhulu yiclinic, umuntu uyagula lobanini kuswelakale lokuthi uzathwalwa ngubani esibhedlela kukhatshana, ngakho kufuze besiyakhele iclinic ngokuphangisa ngoba kulabadala abangasakwanisiyo lokuthi bengaziphandela.”
Amos Dube
UDube ukhala njalo ngemfundo yabantwana ephansi kakhulu kulumango ngenxa yokusweleka kwezikolo.
“Umntwana uyathwalanzima ukuyafik' eSizinda khonale, udleni, kadlangalutho lokulifuqa ibhasikili kuyamehlula ngoba kalitshoveki nxa elambile lokuyafika esikolo ukuthi afunde kuzamehlula ngoba elambile, kodwa nxa isikolo siseduze uyakwazi ukuthi afunde kubengcono.”
UMnumzana Philani Moyo, okubandla leZanu PF okhankasela ukumela iHwange West edale lephalamende, uthi uzasebenza gadalala ukulungisa okuhlupha izakhamizi lezi.
“Kungenzakala ukuthi ngingene, ngikhangelele ukuthi inhlupho zonke zakithi eHwange West sikwanise ukuba sizilungisise ngoba obekusenza ukuthi zingalungiseki yikuthi bekunzima ukuthi sithole abangasimela ikakhulu kwabaphuma kuqembu elibusayo besingelabo.”
UMnumzana Somveli Dhlamini, okukhetho olufanayo, uthi uzimisele ukuqeda ubuyanga balindawo ngaphansi kwebandla leMDC-T.
Somvelo Dhlamini
“Ngikhangelele ukuthi ngithuthukise impilo zabantu ngemisebenzi abantu besebenze, njalo imigwaqo ifile kakhulu eHwange West. Ungakhangela umgwaqo weNdlovu, eChisuma, eBatoka ifile kakhulu njalo ukuze ilungiswe kufuze kube loMember of Parliament ozakumela lokhu ephalamende.”
Imizamo yokuxhumana loMnumzana Vusumuzi Moyo weCitizens Coalition for Change, laye ozancitisa esigabeni lesi, yehlule ngoba ebike ukuba ubambekile ngezomkhankaso njalo uhlutshwa layibulembu ecingweni lwakhe.
Impumela yophenyo olwenziwa ngabenhlanganiso yeRural Zimvac Assessment kumnyaka ophelileyo luthi abantu abanengi esabelweni seMatabeleland North, baphakathi kwendlala eyesabekayo njalo indawo le yande ngezintandane labafelokazi kanye lentsha eyaphelela emfundweni ephansi kakhulu.
SEE ALSO:
Udaba Esilwethulelwe NguNokuthaba Dlamini