HARARE -- Ikhomishini elawula ezokhetho eye Zimbabwe Electoral Commission (ZEC), ithi isisalelwe ngokulutshwana ukuba iqede umsebenzi wayo wokulungiselela ukhetho lwalonyaka. Ithi iphazamiswa ngezinye indaba zalabo abafuna ukuncintisa ezilokhe zisemithethwandaba.
Lokhu kuza ngesikhathi kungase nsuku zatshwala ukuba ukhetho luqhutshwe elizweni.
UMnu. Rodney Kiwa, umsekeli kamgcinisihlalo weZEC, uthi amalungiselelo okhetho asesibangeni saphezulu, esithi uzulu kumele ayethembe iZEC ukuba izakwenza ukhetho olukhululekileyo.
“Sesise duze nge 80% ukuba silungele ukhetho luka Ncwabakazi. Ivoters roll isikhona. Abancintisayo sebeyitholile ivoters roll. Sesibeke indawo ezifika 11501 zokuvotela”
Uthe iZEC isivumele abantu abafika phose ikhulu lengenye-169 asebevunyelwe ukuhlolisisa ukhetho lwalonyaka.
ZEC elections preparedness
Uthi labo abavela kwamanye amazwe abakaqali ukuvunyelwa ukwezohlola ukhetho kuleli.
UKiwa uqhubeke esithi sebeqalile ukuprinta amaphepha alabo abazancintisa kukhetho, esithi bamiswa yalabo asebese indaba zabo emadale omthethwandaba.
“Indaba izisemadale ziyasiphazamisa. Sizaqinisela nje ukuba ziphela ukuze senze umsebenzi”
Ibandla le CCC lithi kalithembi ukuba iZEC izaqhuba ukhetho olukhululekileyo. Lokhu kutshiwo ngumsekeli wesikhulumeli se CCC uMnu Felix Mafa.
“IZEC iyasimangalisa ukuthi ayikaqedi. Izaqeda nini kungasela sikhathi. Abanye abantu abakho ku voters roll. Besaba ukukhulua iqiniso besenzela ukuba singacubunguli ivoters roll. Akusela sikhathi bayaphuza nje”
Kodwa omela iZANU PF eMpopoma Mzilikazi uAdmire Masikati uthi bayayithemba iZEC.
“Thina asikhali kangako ngoba izinto zonke zihamba ngendlela. Amabizo omuntu wonke akhona ku Voters Roll. Okwakhathesi thina sibona engani iZEC isebenza kuhle”
Ingcitshi ecubungula ezombusazwe uNkosikazi Mirriam Sibindi uthi kumele iZEC isebenzelane lamabandla wonke ezombusazwe ikakhulu aphikisayo.
“Sikhangele okuselizweni inengi aliyithembi iZEC. Kumele isebenze ndawonye labo ngoba babona engathi isebenze lebandla elibusayo”
IZEC ithi ekuqaliseni kwenyanga ezayo izakhipha amabizo endawo lapho okuzavotelwa khona amapolling stations.
Mhlaka 18 Ncwabakazi kuzakuba lilanga lapho amaphepha awama ballot papers azatshengiswa khona amabandla wonke ezombusazwe ancintisayo.
Your browser doesn’t support HTML5
Udaba lwabeZEC ngamalungiselelo okhetho siluphiwa nguMlondolozi Ndlovu