HARARE -- Ele Melika, linikeze uncedo lwezigidi ezimbili zamadola akwele Melika-U$2million, enhlanganisweni ephathisa amazwe womhlaba ngoncedo lokudla eye World Food Program ezasetshenziswa ukuthenga ukudla kokunceda abaswelayo e Zimbabwe. Limali iphiwe abeWFP Ngolwesine ngabohlangothi lukahulumende oluphatisa amazwe womhlaba ngoncedo olwehlukeneyo olwe United States Agency for International Development (USAID).
Umsekeli wesikhulumeli seWFP Zimbabwe, uMnu Tatenda Macheka utshele iStudio 7 ukuba abantu abanengi abahlala emadolobheni bazasizakala ngoncedo lwe USAID lolu.
Ingcitshi ebona ngendaba zokudla ku USAID uNkosazana Erina Machoko uthi uhlelo lolu luzaqhutshwa okomnyaka owodwa bencedisa abaswelayo.
Osaphethe isikhundla so mholi we USAID uNkosikazi Priscilla Sampil uthi ukhangelele ukuthi uncedo lolu luzasiza abantu abathile ngesikhathi abanengi bethwele nzima ngendlala elizweni ebangelwe yikungananga kuhle kwezulu.
Umholi weWFP eZimbabwe uNkosikazi Francesca Erdelmann uthi uhlelo lolu luzanceda abanengi abadla inqweqwe zomlomo emadolobheni.
Izisebenzi zika hulumende zalile ukukhuluma le Studio 7 zisithi kaziphiwanga imvumo yokukhuluma.
Imizamo yeStudio 7 yokukhulumisana lomphathintambo wezisebenzi lenhlalakahle kazulu uMnu Paul Mavima, ibe liphutha njengoba ubengadobi ucingo lwakhe.
Eminyakeni emihlanu edluleyo iUSAID yenelise ukuncedisa ele Zimbabwe ngosizo lokudla, olubiza izigidi ezingamatshumi afika phose amabili aweMelika- US$164 million.
Kuthike kusukela ngomnyaka ka1980, ilizwe lithola uzibuse, iUSAID isiphe uncedo olubiza amadola eMelika aphezu kwamabillion amathathu-US$ 3.2 billion.
Lokhu kwenza ele Melika libe ngelikhokhelayo phezu kwamazwe wonke womhlaba athe anceda uzulu kwezempilakahle, ezenhlalakahle, ukudla lamanzi ahlanzekileyo.
Your browser doesn’t support HTML5
Udaba loncedo oluphiwe iZimbabwe ngabe-USAID