HARARE - UMongameli Seyyed Ebrahim Raisi wakwele Iran, usefikile kwele Zimbabwe, kuhlandla lokucina lohambo lwakwe lokwethekelela amazwe amathathu awezwekazi leAfrica.
Uhambo lolu lwenziwa ngesikhathi abantu abanengi bekhonona ngokuthi umbuso wele Iran ngowocuku njalo wephula amalungelo abantu okugoqela labo abaphikisana lohulumende labalombono owehlukene laye.
Lolu hambo aluqalele kweleKenya, waya eUganda ecinela kwele Zimbabwe lubikwa lujonge ukuqinisa ubudlelwano kwezomnotho phakathi kwelizwe lakhe lamazwe awezwekazi labensundu.
Ekhuluma lentathelizindaba esigodlweni sikamongameli we Zimbabwe, ese State House, uMongameli Raisi uthe ele Iran lizimisele ukusebenza ndawonye lele Zimbabwe.
Iranian President Visits Zimbabwe
“Kuvele sifuna ukuba sivuselele ubungane bethu. Sibambene sonke silakho ukuzama ukuvusa umnotho wethu kungela abantu abasiphazamisayo”
UMongameli Emmerson Mnangagwa, omamkele esilindweni sendizamtshina ese Robert Gabriel Mugabe International Airport, eHarare, uthe ele Zimbabwe lele Iran ngamazwe aphansi kwezijeziso zomnotho, awezetheswa ngamazwe angentshonalanga, ngakhoke kubalulekile ukuthi bafunde okunengi emazweni akusimo sinye labo anjenge Iran.
“Kuqakathekile ukuthi thina esetheswa izijeziso zenotho sikhulumisane. Abasinika izijeziso abafuni sikhulumisane. Ngiyathaba ukuba siyakuvumelana lokhu lo Mongameli we Iran”
UMongameli ubike njalo ukuba ele Zimbabwe lele Iran alobelana izivumelwano ezifika amatshumi amabili kwezomnotho. Uthi ele Zimbabwe lokhu lifunda okunengi ikakhulu kwezemitshina yakulezi nsuku isuka kwele Iran. Kunje uthi ele amazwe womabili alobelana izivumelawano emsebenzini wezokulima, ezokwemba lakweziye inhlanganothi zokuthuthukisa umnotho welizwe.
Kodwa ingcitshi kwezomnotho efundisa ekolitshini ye University of Zimbabwe kuzifundo zamabhizimusi uNkosikazi Patience Moyo uthi ele Zimbabwe lingabe selizama ukudinga abanye abangane ngemva kokungazwanani lamazwe athuthukileyo anjenge Melika.
Iranian President Visits Zimbabwe
“Ubudlelwano phakathi kwamazwe womabili lawa kumele sikukhangelisise ngoba ele Iran livele lingela okunengi elizakupha ele Zimbabwe. Kumele sinanzelele ukuba sebeliswana lele Melika”
Kodwa ingcitshi kwezombusazwe uMnu Bekezela Gumbo esebenza lenhlanganiso yeZimbabwe Democracy Institute uthi ele Zimbabwe lizama ukukhanga abanye abangane ngemva kokwehluleka ukukhanga ubedlelwano lamazwe afana labo Bhilithane lamanye.
“OIran labo Russia sasivele silabo. UMnangagwa uzama ukwethusela ele Melika. Iran ayisikho ukuthi sizwana labo, basetshenziswana le Britain le Melika ukuba bethuke”
EleIran njenge Zimbabwe liphansi kwezijeziso zomnotho zakwele Melika lamanye amazwe atuthukileyo kungenxa yokwephula kwalelo lizwe iziqondiso zokulawula umsebenzi wokulungiswa kwezikhali zombubhiso ezeNuclear.
URaisi uqale uhambo lwakhe lokwethekelela ezwekazi le Africa ekwele Kenya lapho alobelane izivumelwano ezithile lalelo lizwe ezigoqela ukusungulwa kwenkampani enkulu elungisa izimotha zakwele iIran eMombasa.
Esuka kwele Kenya izolo ulubhekise kwele Uganda ecinela kwele Zimbabwe namhlanje. Kusasa ugqiba uhambo lwakhe lokwethekelela amazwe amathathu awezwekazi labensundu, andubana aphindela ekhaya khona kusasa.
SEE ALSO:
Udaba Esilwethulelwe NguMlondolozi Ndlovu