HARARE - Abenhlanganiso ebona ngeze nguqu emhlabeni jikelele eyeFederation of International Football Associations (FIFA) sebekhethe ikhomithi ezakhokhelwa nguMnu. Lincoln Mutasa ezakhokhela ezenguqu eZimbabwe kuze kufike uNhlangula ngomnyaka ozayo.
Lokhu kuza ngemva kokuba sebevumelene ukuba eleZimbabwe lamukelwe kulumanyano osokuzakwenza leli lizwe liphatheke kumncintiswano wamazwe womhlaba eyeWorld Cup eka 2026.
IFIFA ibumbe ikhomithi yabantu abane ebizwa ngokuthi yiNormalization Committee ekhokhelwa nguMutasa. Abanye abakukhomithi lenguSikhumbuzo Ndebele, owadlalela iqembu leHighlanders FC, uRosemary Mugadza owayengumqeqetshi weMighty Warriors kanye legqwetha elithakazelela umdlalo wenguqu uNyasha Sanyamandwe.
UMugadza utshele intathelindaba ukuba bazazama ngazo zonke indlela ukuba balungise ubunzima obubhekane lomdlalo wenguqu eZimbabwe.
“Besesilomnyaka kungela obe kusenzakala. Siyabonga ukuba uhulumende, iCOSAFA le FIFA bakhangela ukuba singenzani ukuthi ibhola lethu lithuthuke. Sizahlala phansi njengabake badlala inguqu ukuba silungise ibhola.”
Lokhu kusekelwe nguNdebele othi, “Sithabile ukuba nxa ukhangele lindaba, kube lokuhlukumezana lokungezwani. Ekucineni sikhangele okufunwa ngabantwana ukuthi sivuselele impilo zabantwana. Bebengasela themba ukuba ikusasa yabo ingaba njani. Ngiyajabula ngalokhu.”
Umphathintambo kahulumende wezemidlalo, uKirsty Coventry, uthi inyathelo leli lizakwenza ukuba umdlalo wenguqu uphathwe ngendlela elenhlonipho.
“Lokhu kakwenzakalanga ngelanga elilodwa. Sithatha ukuthaba ukuba sasebenza ndawonye ukuze sibe lapha. Sesibonile ukuba njenge Zimbabwe silakho ukusebenza sonke.”
UMnu. Zibusiso Moyo, omunye wabalandeli bomdlalo wenguqu, wamukele ngenjabulo ukubuyela kwele Zimbabwe emidlalweni yamazwe womhlaba.
“Kuyasithokozisa ukuba sesizadlala ibhola. Thina besivele sesikhanuka ukubona abantwana bethu besenza lokho abakufunayo. Kuyasithokozisa.”
EleZimbabwe belimiswe ukudlala inguqu lamanye amazwe ngemva kokudonselana okjusuke kwaba khona phakathi kweFIFA lekhomishini kahulumende eyeSports and Recreation Commission ngo 2020, ngenxa yokukhipha kwayo inkokheli eyeZimbabwe Football Association (ZIFA), ekaFelton Kamambo labanye bakhe okwabonwa yiFIFA njengokungenela kuka hulumende kwezomdlalo wenguqu kuphambana leziqondiso zokulawula umdlalo lo.
Ukukhitshwa kuka Kamambo yena owayesetheswa amacala obukhohlakalo kwenza ukuba iZimbabwe ingenelisi ukuphatheka kumidlalo yenguqu emhlabeni wonke jikelele.
Ngemva kokuza kwe FIFA kuleli kunyanga ezisanda kwedlula, inhlanganiso yeFIFA icine ivumelana leSRC ukuba eleZimbabwe livunyelwe ukudlala lamanye amazwe womhlaba.
Ukukhulumisana lokhu kube phakathi kweSRC, Confederation of African Football leConfederation of Southern African Football.
SEE ALSO:
Udaba Esilwethulelwe NguMlondolozi Ndlovu