Amapholisa abikwa esenqabele ibandla leCitizens Coalition for Change ukuthi liqhube imihlangano yalo emibili e Gokwe Central leGokwe Kambunyuni ngoLwesine ngoba esithi kuleminye njalo imbuthano ngalelolanga okuzabangela ukuthi engenelisi ukulondoloza ukuthula.
Lokhu kuza ngemva kwencwadi elotshwe lugatsha lwamapholisa olubona ngeziphathelane lokhetho, luxwayisa amapholisa ukuthi engavimbeli mahlayana amabandla aphikisayo ukuqhuba imihlangano yawo ngoba kuzabangela ukuthi kuthiwe ukhetho belungakhululekanga.
Isikhulumeli samapholisa uMnu. Paul Nyathi uthi incwadi le ayethulwanga ngokusemthethweni njalo basadingisisa ukuthi ngubani owabangela lokhu. Utshele iStudio 7 ukuthi kakemukeli umbiko ngokuvinjwa komhlangano weGokwe.
Kodwa umsekeli wesikhulumeli sebandla leCCC uMnu. Felix Magalela Mafa uthi ukudingisisa kwabo kuveza ukuthi ayikho eminye imihlangano ehleliweyo ngalelolanga.
Uthi ibandla lakhe selidinge amanye amaqhinga okukhankasa lokubuthana lingavinjelwa kodwa elingasoze liwaveze okwamanje.
Your browser doesn’t support HTML5
Ingxoxo loMnu. Felix Magalela Mafa