BULAWAYO - UDumaza Dube, owayengumqeqetshi weqembu labafana abaleminyaka engaphansi kwelitshumi lanhlanu elimela ilizwe emdlalweni wenguqu, uthi sekulomehluko omkhulu phakathi kwabaqeqetshi bakulezinsuku lalabo ababekhona kudala.
UDube, osebenzele amaqembu abalisa eleHighlanders kanye leleBantu Rovers, uthi sesadlula isikhathi esokuba abadlali bebhola bengekela ukudlala inguqu babe ngabaqeqetshi kalula kanjalo.
UDumaza Dube labanye abaqeqetshi beHighlanders FC juniors
“Umqeqetshi wakudala lomqeqetshi wakhathesi obizwa ngokuthi ngucoach educator kutshiyene kakhulu. Kudala kwakungafundelwa ukuqeqetsha abantwana. Khathesi sekufundelwa ukuba umntwana ingqondo zakhe zikhula njani nxa efundiswa ibhola lalapho nxa umzimba wakhe ukhula kumele umqeqetshi abekwazi ukuthi kumele amfundise njani. Kudala kwakungekho konke lokho, umuntu wayesithi engazizwa elentshukuntshu aqeqetshe.”
UDube uthi abaqeqetshi bakulez’insuku kabasayenzi okukucabangela ngoba sekusentshenziswa ulwazi lwakulez’insuku, ikanti kudala abanye abantwana babethwala nzima ngoba umuntu elethambo elikhulu.
UDumaza Dube usemhlanganweni wokulolonga abaqeqetshi bomdlalo wenguqu. (Courtesy Photo)
“Ekuqeqetsheni lapha ngahlangana labaqeqetshi abanjengo Ali Baba Dube owayengumqeqetshi omkhulu engangimthanda. Wayethi nxa egumula engakubona uleziqwanga ahle athi yeyi ndoda suka lapha isayizi yakho kayikho lapha yekela abantwana bedlale ibhola. Kudala kwakuhlekisa ngoba kwakugunyulwa kuphongu khangelwa nje okokuthi nxa ulomzimba omkhulu njalo ulazi ibhola uhlupha, kwakuhle kuthiwe hayi wena kawudlali loba nje ungumntwana. ”
Ngesikhathi esakhula uDube udlalele amaqembu ambalwa koBulawayo, eMasvingo kanye laseTriangle.
“Emdlalweni wenguqu ngadlalela iqembu leIngwebu Crackers sayingenisa kuDivision One ngo1985. Ngisuke lapho ngadlalela amaqembu abalisa eleKismet United, iTriangle United, iStars United kuDivision One. Ngike ngadlala lakuqembu leHighlanders kodwa angidlalanga okwesikhathi eside.”
UDube ufundele ukuba ngumbalisi ekolitshini leBondolfi eliseMasvingo lapho afunde ndawonye labanye abadlali benguqu abadlale kuzinga laphezulu ababalisa uTawurayi Mangwiro laye ongumqeqetshi njalo osebenzela elizweni leBotswana.
Ubengumqeqetshi weqembu labafana abasakhulayo abaleminyaka engaphansi kwelitshumi lanhlanu eliphatheke kumncintiswano weYouth Olympics oqhutshelwe kwele Singapore ngomnyaka ka2010.
Kulez’insuku usebenzela kwele Namibia.
SEE ALSO:
Udaba Esilwethulelwe NguJoseph Njanji