HWANGE --Izakhamizi zasemaphandleni aweHwange phansi kukaNduna Mvuthu zibuthene ngoLwesihlanu emkhosini wokubukisa ezokulima, ukweluka kanye lokufuya.
Lumkhosi uhlelwe ngenjongo yokuzofundisana ngendlela yokuqhuba lumsebenzi ngesikhathi umhlaba ubhekane lodubo lokungani kuhle kwezulu kudalwa yikuguquka komkhathi, i-climate change.
Omunye wabesifazana abakade bekhona kulumkhosi, nguNkosikazi Winfrida Ncube yena oyintshantshu yokulima ngo ga-tshompo njalo engumfuyi omkhulu wengalukhuni lenkukhu.
Hwange Agric Expo
“Ngingatshaya ugatshompo wami ngiyazuza amabele athe xaxa ngidle umnyaka uze uyephela labazukulu bami. Angicelimpuphu, ngihlala ngibekile esiphaleni, kuyangisiza kakhulu kulokuthi ngiye esitolo.”
UNkosikazi Shamiso Mpofu uthi kulusizi ukuthi inengi selalahla indlela yokulima eyendulo yokulima amabele angadingi izulu elinengi okufana labonyauthi upholo lezinye.
“Impilo eyayiphilwa ngokhokho ibiyehlukene leyethu, sesikubonile ukuthi impilo eyeyiphilwa endulo lakhathesi njengoba kwehlukene kwakusenziwani sakudinga sakuthola ukuthi kumele ukuthi abantu badle ukudla esikulimayo okuvele emhlabathini ezingafakwanga izinto ezinjengama chemicals."
Hwange Agric Expo
Umgcinisihlalo weqembu labalimi abadabuka eMatetsi, eChidobe kanye le Kachechethe, uMnumzana Ngqabutho Sibanda uthi lumcimbi wenziwe ngoba sebenanzelele ukuthi iyasweleka imfundiso kuzakhamizi ngezokulima emizameni yokumelana lendlala ebangelwa yikungani kuhle kwezulu kudalwa yikuguquka komkhathi kule iminyaka.
“Indlala ikhona ngoba nxa abantu ubafundisa bathatha kancane kancane, indlala ibangelwa yikuthi balima zonezo izilimo okuthiwa bengazandisi ezinjengabomumbu kodwa sekungcono, lonyaka nje yikuthi izulu kalinanga kuhle kodwa nxa izulu line kuhle, ngalokhu ayibi kangako.”
Abenhlanganiso ezimeleyo abakumssebenzi wokukukhuthaza ukulondolozwa kwemvelo, eyeIgugu Trust bakhuthaza abantu ukwakha izibaya ezigonjolozelweyo ukuze bathole imvundiso.
Ongumfuyi uMnumzana Mbuso Nyathi uthi kusukela ekusungulweni kwalinhlanganiso ngomnyaka ka2020, sebebumbe amaqembu ezakhamizi ezedlula ikhulu, okugoqela lalabo abangafuyanga bebolekana izifuyo ezigonjolozelwa ezivandeni.
“Samanyana singabantu abangu five, kulaba silenkomo ezingu 65 esizithathayo. Umuntu lomuntu siyahlala seven days sitshintshe siyekomunye sifaka izibaya lezi sisenzela ukuthi sonke sikwanise kanye longelankomo akuzuze khonokho lathi esilakho. Izulu lethu lilutshwana yikho sifaka seven days ngoba umhlabathi wethu ligusu, alilamvundo omnengi njalo kuyasihambela ngoba sesivune okuhle kakhulu.”
UMnumzana Memory Sibanda kuhlangothi lukahulumende olweAgritex uthi baphathisa abalimi ngenhlanyelo zezilimo ezehlukeneyo okuthiwa ngama small grains ayiwo avuma kulesi sabelo.
“Inhlanyelo lezi zenhlamvu encane ayamelana lezulu eliluthswana, ayamelana lokutshisa kwelanga kakhulu.Uma siqathanisa lomumbu, umumbu kawukwanisa ukubekezela kodwa amasmall grain ayabuna kodwa izulu lingaphenduka kuyavuka kunike umlini isivuno esingamphilisa.”
Lumkhosi oqhutshelwe emavinkilini aweNdlovu Business Centre, eHwange, ubuthanise ingcitshi zokulima, ikakhulu abesifazane abaveze ukuba insuku sezadlula ukuthi bagoqe izandla, ngakho bakubone kufanele ukuhlanganela ndawonye befundisana ngokuthi bangathola njani inzuzo emsebenzini wokulima lokufuya baselele imuli zabo kusimo somnotho welizwe esingamanga kuhle.
Kuphenyo lwezempilo kazulu olwenziwa yinhlanganiso yomanyano wamazwe iUnicef ngenyanga kaMabasa baveze ukuba inani labayizigidi ezimbili-2 million e Zimbabwe lisesimeni sendlala esabekayo, njalo insane ezinengi kazikhuli kuhle ngokuswela ukudla okwakha umzimba.
Impumela yophenyo olwenziwa ngabenhlanganiso eye Rural Zimvac Assessment, emangweni oweHwange esabelweni se Matabeleland North, uveza ukuba banengi abangatholi ukudla ngemfanelo.
Abe Unicef bathi lokhu kubangelwa yikuguquka komkhathi osekusenza izulu lingani ngendlela yayizolo, ukuwa komnotho welizwe kanye lokubhaha kwemikhuhlane ehlasela uzulu, okwenza uhulumende engenelisi ukuphathisa ngokugcweleyo kulabo abaswela ukudla.
Your browser doesn’t support HTML5
Udaba lombukiso wezokulima eHwange siluphiwa nguNokuthaba Dlamini