HARARE -- Umthethwandaba waphezulu oweHigh Court uthi uzakuma kancane ukupha isinqumo kudaba olukhwezwe kuwo, lapho elinye ilunga le ZANU PF uMnu Lovedale Mangwana afuna uMnu. Saviour Kasukuwere avinjwe ukuncintisa kukhetho lokudinga umongameli welizwe.
UMangwana uthi uKasukuwere usehlale isikhathi eside engekho elizweni okungavunyelwa ngu mthetho welizwe esithi ngenxa yalokho kumele amiswe ukuncintisa kukhetho lwalonyaka.
Isikhulumeli sika Kasukuwere uNkosikazi Jacquilene Sande uthi bazalinda okuzaphuma emthethwandaba.
USande uphinde watsho ukuthi kulomunye njalo umsekeli we ZANU PF, umnumzana George Masters usebeke isicelo esifanayo emthethwandaba sokuthi uKasukuwere angavunyelwa ukuncintisa kukhetho lwalonyaka kodwa udaba lolu luzangena edale ngeviki ezayo.
Kunjalo nje, amapholisa aweMasvingo avume ukuba abeCCC baqhube umhlangano wabo wokukhankasa endaweni eseduzane lesikolo eseNyajena Primary School, kodwa babikwa beyaliswe ukuthi balethe abasekeli babo ngamabahasi abavela kwezinye izigaba njalo lokuthi bengatshayi itoyitoyi emhlanganweni lo ngoba kungadunga ukuthula.
Ingcwethi ezicubungula ezombusazwe zithi kuyadanisa ukuthi ukuvinjwa kokuqhutshwa kweminye imihlangano yabeCCC, eminye ifakelwa imigoqo, kwenzakala ngesikhathi abeZanu PF bona bevunyelwa imihlangano yabo kungela migoqo enjengeyeCCC.
Kunje kusasa, ngoMgqibelo abeZanu PF ukuya emhlanganweni omkhulu abawubiza ngokuthi yiStar Rally, ozakhokhelwa nguMongameli Emmerson Mnangagwa, eMagunje esabelweni seMashonaland West, lapho abaqoqe ukuba lamabhasi angamakhulu amahlanu-500, azathwala abasekeli babo bebasa kulowo mhlangano.
Your browser doesn’t support HTML5
Udaba lokusiwa emthethwandaba kukaKasukuwere siluphiwa nguMlondolozi Ndlovu