HARARE - Abafundisi bokholo lwesiKatholika phansi kwenhlanganiso eyeZimbabwe Catholic Bishops Conference ngoLwesine bethule incwadi yombiko wokukhonona ngezehlakalo zodlakela olwenzakala elizweni besithi abamabandla ezombusazwe kumele bakhankase lokuvota ngokuthula.
Lokhu kuza ngesikhathi abacatshangelwa ukuba ngabasekeli beZANU PF bevimba ibandla leCitizens Coalition for Change ukukhankasa eBikita South, eChivi lase Chiredzi, sekuqale isikhathi sokhetho elizweni.
Abafundisi laba bathi umumo oselizweni ngesikhathi sokhetho uveza sobala ukuba amabandla ezombusazwe alakho ukucina edala isimo esilokufuthelana okungadala ukuthi kube lodlakela elizweni.
Isikhulumeli sabafundisi beZCBC, uFather Tryvis Moyo, uthi kumele umuntu wonke asebenzele ukulondoloza ukuthula kungabi lokufuthelana elizweni ngesikhathi sokhetho.
“AmaBishop ethule ugwalo elobela inzalo yonke yesizwe se Zimbabwe oluphetha okuqakathekile ikakhulu ngesikhathi sokhetho bathi ngalesisikhathi somkhankaso kumele abantu bananzelele ukuqakatheka koluntu. Konke kakwenziwe ngokuthula lokubambana.
Loba nje kungayisikho kwakuqala ukuba betsho lokhu, luya luqhela udlakela elizweni ngemva kokuba abacatshangelw aukuba ngabasekeli beZANU PF bevimbe abebandla leCCC ukwenza imihlangano yabo yokukhankasa esigabeni seMasvingo.
Umsekeli wesikhulumi seCCC, uMnu. Felix Magalela Sibanda, uthi umongameli webandla leCCC, uMnu. Nelson Chamisa, uvinjwe ukwenza imihlangano eBikita South lako Chivi ngoLwesine.
“IZANU yenza umathanda batshaya abantu, bethusela abantu. Yibo abatshotshozela lokuphehla udlakela. Okukhona yikuba thina abantu bayasithanda kodwa iZANU isiphelelwe.”
Amandla ezombusazwe aphikisayo athi kusobala ukuba iZANU PF iyesaba ukunqotshwa kukhetho. Lokhu kufakazwe nguMnu. Msongelwa Ndlovu, isikhulumeli seZAPU.
“Sikubona kusobala ukuba udlakela lwenziwa ngamalunga eZANU PF esaba ukunqotshwa. Umongameli wabo uvele uthanda udlakela. Silethemba ukuba bazakwenza umsebenzi ngokuthula.”
Kodwa isikhulumeli seZANU PF, uMnu. Christopher Mutsvangwa, uthi ibandla lakhe ayisilo elitshotshozela udlakela oluselizweni.
“Siyamangaliswa yikuba bathi yithi esilodlakela. Bona bavele abathandwa ngabantu. Ngoba nxa sikukhangele yikuba sebesesaba ukhetho.”
Ingcitshi ecubungula ezombusazwe, uMnu. Pride Mkono, uthi kusobala ukuba zinengi izehlakalo zodlakela ezibikwa zikhokhelwa ngabeZANU PF elizweni jikelele.
“Ibandla le ZANU PF liyesaba ukhetho. Yikho sibona abakwenze eMasvingo. EBikita abantu bayaxotshwa ku lithium, eChilonga abantu bakhitshwa emasimini. Abantu bazandile yikho iZANU isisesaba.”
Ezinye inhlanganiso ezisoletheule imibiko yokusola ukuqonga kwezehlakalo zodlakela eseziqhamuka elizweni ngaphambilini kokhetho zigoqela iAmnesty International, International Commission of Jurists (ICJ) lezinye.
Omunye othumele umbiko wakhe ngezehlakalo zodlakela elizweni nguMfundisi Kenneth Mtata owenhlanganiso yeWorld Council of Churches lesikhulumeli seCCC, uNkosikazi Fadzayo Mahere, lenhlanganiso yababalisi eyeARTUZ.
Ezinye zalezi zehlakalo zigoqela owayeligqwetha likaNkosazana Joanna Mamombe loCecelia Chimbiri abebandla leCCC kucala labo ababeletheswa lokuba baqamba amanga ukuba bathunjwa ngomnyaka ka 2020.
Ingcwethi ezicubungula ezobusazwe zibika ukuba sezikhona izehlakalo zodlakela eseziqalile ngaphambilini kokhetho osokuyisibonelo sokuthi ukhetho lwalonyaka luzaba lodlakela ngakhoke abantu kabankakhase ukudinga usekelo ngonanzelelo, njengoba inengi likhala ngokuthi abanakanelwa ukuthi ngabe ZANU PF bayavimba amanye amabandla aphikisayo ukukhankasela ukuthola usekelo emaphandleni.