GWANDA NORTH - Izakhamizi lenkokheli zomdabu eGwanda zikhuthaza abantu ukuba bekhankasele ukhetho olukhulu oluzayo ngokuthula njalo kungavotelwa abazamemethekisa udlakela.
Lokhu kusekelwe ngabazancintisa kukhetho lolu.
Lokhu kwethulwe emhlanganweni oqoqwe yinduna uMathema, abalisa lezakhamizi eGwanda North lapho ababize bonke abazaphatheka kukhetho. Labo bakhuthaze uzulu ukuba akhankasele ngokuthula ukhetho oluzaqhutshwa mhlaka 23 Ncwabakazi.
UMnu. Jaston Mazhale, ozancintisa kukhetho lwamalunga edale lephalamende esigabeni seGwanda-Chitaudze ekubandla leCitizens Coalition for Change, uthi akumelanga abantu betshotshozele udlakela.
Okwenzakale eGwanda North ngempelaviki
“Udlakela olukhona yilo oluxotsha abatshali bemali abasezweni labasuka kwamanye amanye kumele kubelomthetho sekele ukuhlukumezana abantu bayesaba ukutshala imali nxa kunjalo imali iyabaleka ezweni. Uma lingaxabana akubi lemali asibeni lomthetho."
Lokhu kusekelwe nguMnu. Dalubuhle Maphosa, ozancintisa kukhetho lwamakhansila eSimbumbumbu kuWard 7 ezimele, othi kumele abantu bebambane ngesikhathi sokhetho.
“Kukhetho lwalonyaka kunzima kithi kodwa ngikhuthaza ukuba sisebenze ndawonye sibambane sithuthukise isiga sakithi eGwanda North kuWard 7 sithuthikisa izikolo zethu sithole amanzi ahlanzi ahlanzekileyo lamandla kagesti."
Umhlangano oqhutshelwe eGwanda North
UNkosikazi Josphine Nsingo, obemele uSazini Ngwenya owebandla leZANU-PF, uthi kuqakathekile ukuqhuba ukhetho olulokuthula.
“Kuqakathekile ukuba sibambane njengesizwe ngihleli lapha lokhe ngikhuthaza abanye bami abeMRP leCCC ukuba sibambane ngingazi ukuthi bona bafisani kodwa thina siyakuthakazelela."
Lokhu kusekelwe nguMnu. Ngqabutho Maphosa, umhleli webandla leMthwakazi Republic Party.
Umhlangano wezakhamizi eGwanda North
"Njengebandla leMRP sikhuthaza ukuthula lokubambana kukhetho oluzayo njalo silapha sizogquqguzela ukuthula lentuthuko loba singela muntu ozasimela kukhetho oluzayo kulandela insumansumane ehlangane labanengi abenze inengi lehluleka ukungena kukhetho olokuthi igama lalowo obezasimela alitholakalanga kuluhlu lwababhalisele ukuvota siyaxolisa badala akuseyikuba yindlela ebelikhangelele. Kodwa siloMqondisi Ndlovu eMzimuni kuWard 21 nguye ozasimela."
Induna uKhulumani Mathema laye ukhuthaze uzulu ukuba abelokuthula ngesikhathi sokhetho.
"Ngiyacela Zimbabwe omuhle ukuba ungaphatheki kudlakela ngesikhathi sisiya kukhetho ngoba lokho kungela buntu njalo akulethi ntuthuko ezigabeni zethu. Inkokheli zomdabu lazo ziyazi njalo lesisekelo sombuso siyakutsho lokho makungabi loyedwa wethu otholakala ephatheka kulokho lobudlwangundlwangu ngoba isisekelo sombuso siqondile akudingi kubalelwa."
Ubudlwangudlwangu sebuqalile ezweni obuphathelene lezokhetho. UMongameli Emmerson Mnangagwa usekhulume kanengi ngokuthula ngesikhathi sokhetho olukhulu oluzayo. Kukhanya engani abanye kabamlaleli ngitsho lakancane.
SEE ALSO:
Induna, Abancintisa Kukhetho Oluzayo Labanye Bathi Kumele Kuqhutshwe Ukhetho Olukhululekileyo Mhlaka 23 Ncwabakazi