GABORONE -- EleBotswana lithi isifiso salo yikuthi libone eleZimbabwe liqhuba ukhetho olukhulekileyo njalo oluzaphumelela. Lelo lizwe lithi njalo ukungaqhubi kuhle komumo womnotho waseZimbabwe kucina kusinda ele Botswana ngoba abanengi abadabuka elizweni elingomakhelwane bacina bebalekela khona.
Ekhuluma lenthathelizindaba eGaborone Ngolwesithathu, umpathintambo obona ngobudlelwano beBotswana lamanye amazwe womhlaba, udokotela Lemogang Kwape uthe kuqakathekile ukuthi eleZimbabwe libambe ukhetho olukhululekileyo.
UKwape uthi umhlubulo wangezansi kwezwekazi le Africa uleziqondiso okumele zilandelwe uma kuqhutshwa ukhetho ngemfanelo.
“Njengelizwe elilombuso wabantu ngabantu, umbono wethu, isifiso sethu yikuthi ukhetho lube ngolukhululekileyo, njalo oluletha impumela. Kumele lube ngoluletha impumela ukuze sithi lukhululekile.”
UKwape uthi umbiko ozakhitshwa liqula lenhlanganiso yeSouthern Africa Development Community Observer Mission, yibo ozakutsho ukuba ukhetho lukhulekile kumbe hatshi.
Kodwa ugcizelele ukuthi njengeBotswana, bathatha umbuso wabantu ngabantu ngokuqakatheka, ngakho bakhangele okufanayo kwamanye amazwe afana leZimbabwe.
“Ngithanda ukuqinisa ukuthi thina njengeBotswana sihambisa phambili umbuso wabantu ngabantu lokuthi kube lokhetho olukhulekileyo. Sifisa okufanayo kuyenzeke eZimbabwe.”
Uthi okwenzakala eZimbabwe okufana lomumo womnotho ongamanga kahle kuyalimaza eleBotswana.
“Abantu beZimbabwe bayachapha babuye ngapha kucine kusiba yithi esiba lomthwalo wokubangcina.”
Umongameli Emmerson Mnangagwa, olobudlelwano lomongameli weBotswana, umnunzana Mokgweetsi Masisi , yena uthembisa ukuthi ukhetho lwalonyaka oluzabanjwa ngoMpalakazi, luzabe lukhululekile.
Kodwa abamabandla aphikisayo bathi inkundla kayilingani ibandla leZANU PF kuyilo elilawulayo, okwenza ukuthi ukhetho lungabi ngolukhululekileyo.
Ocubungula ngezombusazwe, umnunzana Effie Dlela Ncube uthi kuqondile ukuthi amazwe afana leBotswana azame ukuthi kubelokhetho olukhulekileyo eZimbabwe.
“Kuyinto enhle ukuthi ilizwe leBotswana kanye lamazwe ase Africa kanye langaphandle bancedise ukuthi kubelokhetho olukhululekileyo, ukuze kuyeneliseke ukuthi eleZimbabwe kelikhangele ezomnotho okuyizo ezichithela abantu ngaphandle kwelizwe.”
UNcube uqhubeke esithi kodwa akumelanga kuphelele kunkulumo kuphela, kumele kube lamanyathela abambekayo uma kukhona abangahambisi ukhetho ngendlela eqondileyo.
Kumele bedlule ekukhulumeni, ukuze kucace kuye wonke umuntu kanye lamabandla ezombusazwe eZimbabwe, ukuthi ongalandeli indlela eziqondileyo engalutholi usekelo emazweni afana leBotswana kanye lamanye kweleAfrica.”
Ukhetho luza ngesikhathi kwabalokukhala ukuthi ukhwezwa kwentengo yalabo ababefuna ukuncintisa kwavalela inengi phansi, okungabuyisela emuva umbuso wabantu ngabantu, ngoba ukhetho selungenwa ngabalemali kuphela.
Abanye njalo bakhala ngogwalo oluloluhlu lwabantu abazavota besithi amagama abo awakho kumbe asuswa afakwa kwezinye indawo lapho abangavoteli khona.
Your browser doesn’t support HTML5
Udaba lweBotswana ekhuthaza Ukhetho elilokuthula siluphiwa nguMqondisi Dube