GWANDA -- Abakhubazekileyo bakhala ngokuthi babhekane lenhlupho ezinengi empilweni lanxa uhulumende ezama ngazo zonke indlela ukuthuthukisa impilo zabo.
Lokhu kuvele emkhosini wombukiso oweZimbabwe National Disability Expo oqhutshelwe enkundleni yePhelanda Stadium, eGwanda, kusukela Ngolwesithathu wagitshwa lamhla.
UMnu Peter Zulu oweNsindi Village okhubazeke esandleni uthi sesiside bengatholi uncedo oluvela kuhulumende.
“Sesile 3-4 years singanikwa ipublic assistance sizihlalele kuthiwa kuzabuya lamapublic loans kuthwa sizaphiwa kodwa kathesi akulalutho njengoba libona isimo sinje,kathesi safakwa emaresettlement kodwa izinto zokulimisa akula , siyakwazi ukuthi ifertiliser lenhlanyelo bayasipha kodwa izinto zokulimisa akula kungangcono kube lethalikitha eyodwa.”
Zimbabwe National Disability Expo
UMnu Sanders Munsaka owenhlanganiso yeZimbabwe Albino Association uthi inengi labo liyafa ngenxa yokuswela amafutha okugcoba emzimbeni.
“Ijwabu leli lithwalise nzima abantu abale albinism ngoba ijwabu liyatsha , ijwabu lingatsha libangele okuthiwa yiskin cancer libangela izilonda ezinengi, izilonda zingaba zinengi ziyabangela iskin cancer okungumkhuhlane obulala abantu abale albinism.
UMnu Msomi Mlilo olilunga leZimbabwe Visually Impaired Teacher’s Union uthi kuyadingeka ukuthi bathole imitshina yakulezi nsuku lapho befundisa ukuze abangaboniyo labo befinyelele ilungelo labo lezemfundo.
“Imitshina le esikhuluma ngawo sikhuluma ngamacomputer, sikhulume ngamaprojector, sikhulume ngamasmart phone, sikhulume ngamaBraile paper sikhulume ngemitshina yokubhala ibraile ukuze sifundise abantwana kahle, amabhuku atholakala ngoba amabhuku kawekho njalo labo abasemakolitshini abafundela ukubalisa ibraile bancediswe kabanzi yilinhlanganiso.
Zimbabwe National Disability Expo
Emazwini akhe ethulwe ngumphathintambo obona ngezisebenzi lenhlalakahle kazulu uMnu Paul Mavhima, uMongameli Emmerson Mnangagwa uthi uhulumende wakhe uzaqhubekela phambili elwisa ukuthi abakhubazekileyo bathole amathuba alingana laye wonke umuntu elizweni.
"Okokuqala abantu abakhubazekileyo ngabantu labo njengathi njalo kumele bahlonitshwe baphakanyiswe, uhulumende wami uzanikeza amathuba alinganayo kubobonke abakhubazekileyo kunhlelo zentuthuko lapho sisakha ilizwe lethu.”
UMnu Raymond Magudhugudhu ongumajinela njalo engumqeqetshi eSizinda Vocational Training Centre uthi umbukiso lo owe National Disability Expo unikeze abakhubazekileyo ithuba lokuthi babukise iziphiwo zabo.
“Thina lokhu kuyasijabulisa kakhulu , lokhu kuyatshengisa ukuthi disability in not inability njalo sifuna ukuthi abanye babone ngoba abanye lokhu becabanga ukuthi umntwana okhubazekileyo kalancedo kumele avalelwe kodwa nxa abantu bebuka bayamangala ukuthi into enje ingenziwa ngumuntu ongaboniyo.”
Zimbabwe National Disability Expo
Umongameli Mnangagwa unikeze abakhubazekileyo amapulazi amabili, izitanda zezindlu eziyisithupha , imitshina yokusebenzisa ngezandla , inhlanyelo kanye lamakhuba.
Umbukiso walonyaka uqhutshwe phansi kwendikimba ethi “Holistic empowerment of youth and children with disabilities towards the attainment of vision 2030.”
Your browser doesn’t support HTML5
Udaba lombukiso oweZimbabwe National Disability Expo siluphiwa nguAlbert Ncube