HARARE -- Ababili ababulala umntwana owayeleminyaka eyisikhombisa ngabathi uTafadzwa Shamba lo Tapiwa Makore uyise omdala walumntwana. Kunje sebemelele ukugwetswa mhlaka 12 Ntulikazi.
UMahluli uMunamato Mutevezi womthethwandaba oweHigh Court, eHarare, uphe isinqumo sakhe kudaba lolu wathatha amahola amahlanu kusukela ngo 10am ekuseni kusiya fika ngo 3pm emini ebalisa ububi obenziwa ngababili laba.
UMutevedzi uthe isenzo esenziwa ngababili laba sitshengisa ukuba balolunya kungakho ubufumane bele cala.
“Sizahlangana ngo Mvulo mhlaka 10 Ntulikaz, kodwa isigwebo ngizabapha ngoLwesithathu mhlaka 12 Ntulikazi”
Ukubulawa kukaTapiwa okwethusa abanengi elizweni lonke kwenzakala endaweni yase Murehwa ngomnyaka ka 2020. Isidumbu sakhe satholakala sihlinziwe okwakuveza ukuthi wayelinyazwe kakubi.
Ekuthonisweni kwecala leli, abahluleli bathole ukuba kulobufakazi obusegcekeni ukuba uTafadzwa Shamba owayisisebenzi sika Tapiwa Makore wadala lelicala endawonye lo Tapiwa Makore uyise omdala walumntwana. Lokhu babikwa bakwenza ngenhloso yokudinga umuthi wokwenza imali ngokuwuhlanganisa lezitho zomzimba zalumntwana.
UShamba wavuma icala lakhe ngesikhathi ebuzisiswa ngodaba lolu esanda kubotshwa. UMahluli uthe icala eladalwa ngababili laba likhulu kakhulu esithi babangela ubuhlungu obukhulu kubazali balumntwana.
Esinye isakhamuzi se Harare uMnu Mattheas Dliwayo uthi ulethemba lokuba umthethwandaba uzakwethula isigwebo esilukhuni lokujezisa kanzima ababili laba .
“Sithemba ukuba bazaphiwa isigwebo esizakwenza ukuba kube lesifundo esikhulu. Abantu kakumelanga benze amacala afana lalawa"
Ukuphawulwa kwesinqumo lesi kwenziwe phambi komsakazo kamobonakude oweZBC TV loba ilive streaming idale lisithi udaba lolu kufuze lube yisifundo kuzulu.
Kolunye udaba, idale le High Court lidlulisele phambili kumhlaka 7 Ntulikazi udaba lomunye umsekeli we ZANU PF uMnu Lovedale Mangwana, ocele ukuba umthethwandaba wenqabele uMnu Saviour Kasukuwere ukuba acintise kukhetho lokudinga uMongameli welizwe.
Isikhulumeli sikaKasukuwere uNkosikazi Jackie Sandi uthi ulinde loba yini esithi uzancintisa kukhetho.
“Kusobala ukuba kamanga yedwa. Lokhu kwenza sobala ukuba uMongameli uyesaba ukuza kuka Kasukuwere. Sikhuthaza uzulu ukuba baqale ukulinda ukuza kwakhe lokuba bakhangeleleni kuye”
Isicelo lesi siza ngesikhathi uKasukuwere ekhangelelwe ukuba uzaphazamisa amathuba ebandla le ZANU PF ukunqoba ikhakhulu esabelweni se Mashonaland Central lapho adabuka khona.
Ibandla le ZANU PF kumibiko ekhitshwe kumaviki asanda kwedlula lithi kalilani lokungena kuka Kasukuwere kwezombusazwe.
Your browser doesn’t support HTML5
Udaba lokuthonisiswa kwababulala umntwana siluphiwa nguMlondolozi Ndlovu