GWERU-Izakhamizi zaseLower Gweru esabelweni seNkabazwe zikhala ngokuthi zibhekane lendlala enkulu kulandela ukuma kohlelo lokwabelwa ukudla kwabaselwayo lugatsha lukahulumende olwenhallakahle kazulu olwe Social Welfare kusukela ngoNhlolanja lonyaka. Inengi lalezi zakhamizi zithi okudanisayo yikuthi ukudla okulutshwana okubuyayo kunikezwa abasekeli beZanu-PF kuphela, kuthi lenhlanganiso ezizimeleyo ezivame ukuphathisa lazo sezamisa lezi nhlelo zokunceda abaswelayo.
Izulu lana okwamagama ekupheleni komnyaka ophelileyo izakhamizi zagijimela ukulima labuya labaleka izilimo zingakavuthwa zahle zatsha.
UNkosikazi Cravenia Mpofu isakhamuzi zalumango uthi imuli yakhe iyalamba.
"Asiphiwa kudla lapha thina vele basikhangelela khatshana, okungangokuthi izulu linile sibili laba linengi kodwa kutotile emasimini. Kutotile ngenxa yokuswela ifertiliser. Ayi ifertliser asila and asiyitholi futhi impilo yonke ngitsho lenhlanyelo yakhona asizange siphiwe, kuthwa singabantu baka Chamisa."
Ugogo uFortune Mbiba laye uthi akulanto ayitholayo.
"Hayi ekuhloleni asiholi sonke. Kuhola abantu behlangothini oluyi 1. Kunjenje nxa kuthwa kuyabuya kubuya ngokwezalukazi akutholi, izalukazi zangkhona kazitholi. Izalukazi okuthiwa yizalukazi kazitholi kuthola kodwa igenga encane. Iparty etholayo ukudla yiparty yeZANU PF."
UMnu Justine Tshabungu uthi izakhamizi ezingasekeli ibandla leZanu-PF azilimanga njalo azivunanga lutho ngoba zancitshwa inhlanyelo.
"Impilo inzima ngoba , ebunzimeni bempilo yikuthi abantu abanengi okwenze bengavuni, inhlanyelo ibibuya kodwa abantu bengaphiwa bonke phela bekuphiwa bonalabo abebandla elibusayo."
Amazwi kaTshabangu agcizelelwa ngu Mnu Sukoluhle Sibanda umsekeli webandla eliphikisayo leCCC.
"Ngabe silenala enengi kakhulu esgabeni, kodwa ngendaba yokuthi iZANU PF yabuya inikeza, ikhetha imhlibo ikhetha abantu abanye ngogogo okhulu abangakwanisi ukuzithengela inhlanyelo. Kodwa yona yabuya inikeza ababo esingathi yayithiya inhlanzi zayo ezisegabheni."
Umfelokazi uNkosazana Charity Mpofu ucela usizo kodwa umgcinisihlalo we Zanu-PF eSibantubanye District Mdubiwa Ward uNkosazana Dorothy Mnkandla nguye oyabela abaswelayo ukudla kwe social welfare.
"Mina phela yisikhundla sami kuphela kodwa but hanti uyakwazi ukuthi kuyabe kukulutshwane. Kungakwana khonokho abakwanileyo packing yakhona. Ayisikho emzimi wami ingalane yami nansiyana igcwele umumbu laphana. Ukuthi bayakhala abantu bayancitshwa bancitshwa mbani, angithi bayabe berenker bodwa abe Social Welfare"
UMnu K Mgoba usebenzela ugatsha lwesocial services uchaisa in kinga ababhekane lazo.
"Okwanje akula kudla, uhlelo lwethu lwama, sizazama ukulungisa kungenzakala ukuthi siphethundike kungekude ngicabanga ukuthi basadinga imali yezimota ezithwalayo, abathwala umumbu usuka eGMB usiya kuma Ward. Umumbu ungabe ukhona kodwa imali manje ayikho"
UKhansila weMdubiwa Ward uBenjamin Mpala uthi kunzima esigabeni sakhe njalo lempisi sesisidla izifuyo zabantu.
"Sesile almost 4 months iSocial Welfare ingabuyi. So silodubo olukhulu kakhulu. Abantu bayagijigijima lapha bayathengithengisa into ezitshiyeneyo, abanye bathengisa imithanyelo ,abanye bathengisa uxakuxaku. Into azihambi into zimile la. Imali kayibambeki, nanzi lempisi sezisithwalise nzima lapha impisi kumbe zafohla yini ngale emaplazini sezitshayile lapha kimi sezitshaye amadonki amabili zatshaya imbuzi ezingu 7 zatshaya amathole amabili."
Lanxa uMongameli Emmerson Mnangagwa ehlezi eqonqosela ukuthi umuntu wonke oswelayo kumele aphiwe ukudla kungakhathelekile ukuthi usekela liphi ibandla, abanye babalandeli beZanu-PF babikwa bevimbela ukuthi abangasobebandla labo bathole ukudla.
Your browser doesn’t support HTML5
Udaba lwezakhamizi zeLower Gweru lwendlala siluphiwa nguEzra Tshisa Sibanda