WASHINGTON DC – Umthethwandaba weHigh Court uthi uzahluza kusasa isicelo somsekeli weZanu PF ofuna kuvinjwe owake waba yisiphathamandla salelibandla uMnu Savior Kasukuwere ukuncintisa kukhetho lukaMongameli welizwe ngoba esithi ibizo likaKasukuwere alikho kuluhlu lwalabo abalelungelo lokuvota, olwe-voters’ roll.
Umamangala, uMnu Lovedale Mangwana, uthi uKasukuwere uhlale isikhathi esedlula umnyaka olengxenye, 18 months engekho elizweni, khona athi kumthathela ilungelo lokuphatheka kukhetho phansi komthetho weElectroal Act.
UKasukuwere uhlala kweleSouth Africa lapho afohla wabalekela khona ngesikhathi amabutho egenqula uhulumende kamuyi uRobert Mugabe ngo2017.
Kodwa useke waphenduka eZimbabwe wamiswa lasenkantolo esetheswa amacala khepha wafunyanwa emsulwa.
UKasukuwere ungomunye wabantu abalitshumi lanye, 11, ababhalisele ukuncintisa kukhetho lukaMongameli abagoqela uMongameli Emmerson Mnangagwa oweZanu PF lomkhokheli weCCC uMnu Nelson Chamisa.
Ibandla leZanu PF likhanya lizama ngazo zonke indlela ukumvimba nanku leziphathamandla zalo zithi uzabotshwa engavele elugxobe eZimbabwe ngoba elamacala ameleleyo awadala ngesikhathi engumphathintambo kuhulumende kaMugabe.
Ocubungula ezemithetho futhi eligqwetha uMnu Kuda Hove utshele iStudio 7 ukuthi loba nje umamangala esithi uKasukuwere wenqatshelwa ukuncintisa ngumthetho weElectoral Act, kuleminye imithetho yobuzwe uKasukuwere angayisebenzisa enkantolo aphumelele kusasa.
Your browser doesn’t support HTML5
Ingxoxo loMnu Kuda Hove
Ingcwethi kwezombusazwe uMnu Effie Dlela Ncube uthi uMnu Kasukuwere usehlukunyezwa ngendlela uhulumende kaRobert Mugabe ayehlukuluza ngayo abamabandla aphikisayo yena uKasukuwere engumphathintambo kulowo hulumende.
Your browser doesn’t support HTML5
Ingxoxo loMnu Effie Dlela Ncube