BULAWAYO - Lenze izimanga iqembu labesilisa elimela ilizwe leZimbabwe lona elibhaxabule eleUnited States of America ngama runs angamakhulu amathathu lane kumncintiswano weICC Cricket World Cup Qualifier, oqhutshelwa eZimbabwe kulezinsuku.
Iqembu leZimbabwe yilo eliqale ukutshaya ibhola labuthelela ama runs angamakhulu amane lathoba minwe mbili, lilahlekelwe ngabadlali abayisithupha.
Kuthe eleUnited States seliphendula lenelise ama runs alikhulu lane njalo liphelelwe ngumphako ngemva kwama overs edlula kancane amatshumi amabili lanhlanu.
Limpumela itsho ukuba iqembu leZimbabwe libhale kutsha imbali yalo emdlalweni kakhilikithi ngoba belingazake libuthelele ama runs ayedlula amakhulu amane kumidlalo eyohlobo lweOne Day International.
Obengukaputeni weqembu leZimbabwe namhla, uSean Williams, nguye odlale indima enkulu ekunqobeni kweqembu leZimbabwe.
“Ngokubona kwami namhla ngidlale ngendlela engingazake ngidlale ngayo kodwa kumele ngibonge abadlali ebengitshaya labo ibhola abafana loJoylord Gumbie laye otshaye kuhle.
“Ungakhangela indlela esiqale ngayo besingaqalanga ngamadlabuzane kodwa kuthe sekudlule ama overs alitshumi saqala ukuhlasela.”
: UWilliams ukhethwe ukuba nguye umdlali odlale okwedlula abanye ngemva kokuba ethole ama runs alikhulu elilamatshumi ayisikhombisa lane - 174 njalo waphinda waqaga ibhola kabili ngesikhathi sekulithuba leqembu leUnited States ukutshaya ibhola.
Iqembu leZimbabwe liqale ukudlala kuhle kakhulu ngemva kokuqhatshwa kukamqeqetshi, uDave Houghton, nyakenye kodwa yena uthi abadlali yibo asebelethe inguquko ekudlaleni kweqembu.
“Mina engikwenzileyo yikubakhuthaza ukuba bazithembe ngoba vele ithalenta balalo kodwa bebengadlali ngendlela etshengisa ukuba bayawukholisa umdlalo. Siqhube inhlelo zokuba bakhululeke nxa bedlala lalapha bengekho enkundleni njalo lokhu yikho osekudale umehluko omkhulu.”
Iqembu leZimbabwe liphutshe lihlezi phezu kwengalane yesibaya sikaGroup A lilemiklomelo eyithoba minwe mbili. Intathelizindaba yomdlalo kakhilikithi, uDumi Praise Dlakama, uthi lokhu kuzaliphathisa kusigaba esilandelayo esomncintiswano eseSuper Six.
“Iqembu leChevrons namhla litshengisele ukuba lizimisele ukuba liyedlala kumncintiswano wezizwe zomhlaba. Namhla sizananzelela ukuba badalale bevele befuna ukuba bethole imiklomelo ezabaphathisa kusigaba seSuper Six ngoba nxa kungenzeka ukuba sekulamaqembu alingene ngemiklomelo ekupheleni kwesigaba esilandelayo, imiklomelo yemidlalo yezibaya yiyo ezadala umehluko.”
Amaqembu amabili azaqeda imidlalo yeSuper Six ehlezi endaweni ezimbili eziphezu kwengalane yiwo azadlulela kumidlalo eyokudinga intshantshu zomhlaba jikelele ozaqhutshelwa elizweni leIndia ekupheleni komnyaka.
Iqembu leZimbabwe lizadlalela imidlalo yalo eyeSuper Six edolobheni lakoBulawayo ngemva kokuba lidlalele eyezibaya lisesigodlweni iHarare.
SEE ALSO:
Udaba Esilwethulelwe NguJoseph Njanji