HARARE - UMongameli Emmerson Mnangagwa uthi uhulumende wakhe uzadingela abemba igolide lamanye amatshe aligugu imitshina yokuqhuba amabhizimusi abo ngemfanelo.
Kodwa abaphikisayo bathi uMnangagwa uyazikhulumela njengoba sokuyisikhathi sokukhankasela ukhetho oluzaqhutshwa ngoNcwabakazi.
UMnangagwa ukhulume lokhu emhlanganweni webandla lakhe eMutema High School eChipinde ngesikhathi encenga abantu ukuba bevotele ibandla leli.
Ubesesigabeni okwazalelwa khona umuyi uNdabeningi Sithole, omunye wabasungula ibandla elibusayo. Uhulumende wakhe usanda kumnika isicoco seqhawe lesiswe. Abantu abanengi esigabeni lesi basekela ibandla leZanu Ndonga, elalikhokhelwa ngumuyi uSithole. UMnangagwa uthe ibandla lakhe lizakupha uzulu okokulimisa lokokwemba kungela mbhandalo.
Ukhuthaze abasekeli bakhe ukuba bavotele ibandla leZANU PF ukuze indubo zonke ezibhekane lelizwe ziphele. Uthe imbali yempi yenkululeko iveza ukuba iZanu PF libandla labantu. Isakhamuzi seChipinge, uNkosikazi Nokuthaba Mlambo, uthi babhekane lobunzima obumangalisayo ngenxa yokugugudeka komnotho welizwe.
Umsekeli wesikhulumeli sebandla leCitizens Coalition for Change, uMnu. Felix Mafa, uthi okukhulunywa nguMnangagwa akusoze kufezeke.
Kodwa uMnu. Omphile Marupi, odabuka eGwanda, usekela okwethulwa nguMnangagwa.
Lokhu kusekelwe nguNkosazana Sindisiswe Ngwenya ohlala eMangwe.
UMnu. Zenzo Ncube, obemele abalwa impi yenkululeko emhlanganweni lo, uthe sebezatshela uzulu ngokuqakatheka kwebandla elibusayo.
Bekugcwele abantu abavela ezabelweni zonke emhlanganweni webandla leZanu PF eChipinge. Kusenjalo, ibandla leUnited Zimbabwe Alliance seliphanyeke emthethwandaba isicelo sokuthi kuhlolisiswe ukwalelwa kwamalunga alo ukuba angene kukhetho olokhulu oluzayo. Ibandla leli, elikhokhelwa nguNkosikazi Elisaberth Valerio, lithi banengi abakubandla leli abehluleka ukufaka amagama abo engwalweni zabazancintisa kukhetho oluzayo ngenxa yokuthi imali yabo yayingabonakali esambeni seZimbabwe Electoral Commission. EleZimbabwe lizaqhuba ukhetho lwamakhansila, olwamalunga edale lephalamende kanye lolukamongameli mhlaka 23 Ncwabakazi.