BULAWAYO -- Abenhlanganiso elwela ilungelo lokuvota abantu bekhululekile eyeZimbabwe Electoral Support Network basungule uhlelo lokuhamba begqugquzela ukuthi abantu bakhankase njalo bayevota ngokuthula ezweni jikelele elokitshini leCowdray Park koBulawayo.
Njengoba uhlelo lokubhalisa ukuncintisa kukhetho lwalonyaka oluqhutshwa mhlaka 23 Ncwabakazi, lugqitshwe liviki ngokuhlala okwenze idale eleNomination Court sokusitsho ukubana amabandla ezombusazwe aseqalisa ukukhankasela ukuthola usekelo lokuvotelwa kulolu khetho.
Kungalesi sizatho abenhlanganiso eyeZimbabwe Election Support Network besithi bakubone kuqakathekie ukuthi basebenze lozulu ukukhuthaza ukulondolozwa kokuthula ngalesi sikhathi sokukhankasela ukuthola usekelo kungabi lodlame.
Umqondisi wale inhlanganiso koBulawayo uMnu Ndodana Ndlovu uchasisa kabanzi ngohlelo lwabo lolo.
"Sizahamba sikhuthaza abantu ukuba bayevota ngokuthula ilizwe lonke ngoba kuvamile ukuba lodlakela. Sikhethe iCowdray Park ngoba iyaqala ukuba yisigaba esizimeleyo kukhetho."
Isakhamuzi seCowdray Park uNkosikazi Tambudzayi Mudimba uyakusekela lokho.
“Zimbabwe omuhle ngikukhuthaza ukuba uyevota ngokuthula ukuze kubelokuthula lentuthuko ezweni"
UNkosazana Tariro Gurure okhubazekileyo ongene umcimbi walamuhla ukhuthaze abakhubazekileyo ukuba bengaphatheki kudlakela.
"Kuyewonke umuntu ezweni ikakhulu abakhubazekileyo ngiyacela ukuba lingaphatheki kudlakela njalo loyevota ngokuthula."
UNkosazana Sibonile Ngwenya umgcinisihlalo we Women's Coalition of Zimbabwe koBulawayo ukhuthaze abesifazana ukuba labo bayevota ngobunengi bethule.
"Inani labesifazana ezweni elibhalisele ukuvota liphezulu ngakho sicela ukuba omama labatsha bayevota ngokuthula njalo njengeWCOZ yikho esikugqugquzelayo."
Amabandla ezombusazwe aphatheka kukhetho lwalonyaka aseqalile ukukhankasela ukuvotelwa ezweni lonke. Abe Zanu PF baqalele eChipinge lapho abalomhlangano omkhulu oweRally wokusungula umkhankaso wabo walonyaka.
Lisiyatshona ilanga iZEC ibingakaphumi loluhlu olupheleleyo lwamagama abantu abenelise ukuphumelela ukubhalisela ukuncintisa kukhetho lwalonyaka kusiya ngebandla okugoqela lenani elipheleleyo labesifazana abanelisileyo ukungena.
Kodwa umgcinisihlalo weZEC uMnu Rodney Kiwa utshele umsakazo weStudio 7 ukuthi ikomishini yakhe ibingakaqedi ukuhlela iluhlu oluqondileyo lwamabizo abenelise ukuphumelela ukubhalisela ukuthi bancintise.
Amabandla aphikisayo wonke elizweni kawenelisanga ukubhalisa amalunga awo wonke ukuthi ancintise kukhetho lwalonyaka ngaphandle kwebandla elibusayo eleZanu PF elifake wonke amabizo ekhansilini njalo selilamalunga ekhansili adlula amatshumi amahlanu kungakayiwa kukhetho.
Your browser doesn’t support HTML5
Udaba lwabe ZESN lomkhankaso wokuvota ngokuthola siluphiwa nguAnnahstacia Ndlovu