BULAWAYO -- Amaqembu aphuma esigodlweni iHarare asezasebenzisa inkundla ezikwamanye amadolobho ekuphendukeni kwemidlalo yesigaba seCastle Premier Soccer League ngenyanga kaNtulikazi.
Owadlalela iqembu leHighlanders leqembu leDynamos uSimon “Doink” Sibanda, uthi kuyamangalisa ukuzwa ukuba isigodlo selizwe asila nkundla engadlalela amaqembu adlala kusigaba sePremier Soccer League.
“Ngizwa ubuhlungu nxa kukhulunywa ngenkundla ngisizwa ukuba iDynamos isisuka eHarare ngoba esigodlweni kungela nkundla zokudlalela. Asikeni sitshiyane lezombangazwe sikhangeleni abantwana abancane ngoba siyabulala abafana abancane bacine bebhema insango. Iqembu leDynamos kumele libuye lizodlala koBulawayo kumbe eGweru ngokuthanda kwalo ukuthi lizovakatshela abalandeli balo hatshi ngoba eHarare akulankundla. Lapha sekumele abenhlanganiso yeZimbabwe Football Association kanye labe Premier Soccer League bahlale phansi bebonisane baze bayefika lakuMongameli welizwe becele usizo,” kutsho uSibanda.
Ohlala elokitshini laseNjube uAnthony Ndlovu uthi ukuba amaqembu aphuma esigodlweni adlalele kwamanye amadolobho akukho kubi kodwa kumele udaba lwenkundla lulungiswe ukuze lungayali lulokhu luhlupha lakwelizayo.
Antony Ndlovu
“Nxa omasipala okuyibo abanikazi benkundla besehluleka ukulungisa inkundla kungcono bazithengisele amaqembu azilungisele njengalokhu esikubona kusenzakala emazweni lapho amaqembu ayabe engabanikazi benkundla.
Kababathengisele oDynamos inkundla kulokuba babe belokhu bethatha imali kuphela, sibone ukuthi kuzahamba njani,” kutsho uNdlovu.
Oke wahlala elizweni leSouth Africa uKathryn Siziba, uthi kuvamile khonale ukuthola amaqembu edlalela endaweni ezingasikho lapho aphuma khona.
“Akumelanga kube yinto emangalisayo ukuthi iqembu leDynamos lizodlalela imidlalo yalo koBulawayo ngoba siyake sikubone eSouth Africa iqembu leKaizer Chiefs lisiyadlalela endaweni ezitshiyeneyo ezifana laboDurban,” kutsho uNkosazana Siziba.
Ocubungula ezemidlalo uWashington Sibanda yena uthi lithuba elihle elokuba abalandeli bomdlalo wenguqu abakulezo ndawo ezikhethwe ngamaqembu aseHarare ukuthi azodlalela khona bakholise umdlalo wenguqu owezinga laphezulu.
“Ukuzwa ukuba iqembu leDynamos selizabuya lizodlalela imidlalo yalo koBulawayo yinto emangalisayo njalo esingazake siyibone kodwa ukubuya kwalo kutsho ukuba abalandeli sebelethuba elokuba lemidlalo eminengi abangayibukela,” kutsho uSibanda.
Ukudinga ezinye inkundla ezingaphandle kwedolobho leHarare okwenziwa ngamaqembu asesigodlweni kubangelwe yikuvalwa kwenkundla eyeNational Sports Stadium yona obesekusele kuyiyo yodwa esesimeni esihle.
Inkundla le ibisisetshenziswa ngamaqembu wonke asesigodlweni loba nje izambuzi zayo beziphihlika ingcekeza ikanti lesimo senkundla besesiwonakala.
Lokhu kudale ukuba abanikazi benkundla okuyinhlanganiso ebona ngokuqhutshwa kwezemidlalo elizweni eyeSport and Recreation Commission bethathe isinqumo esokuba kayivalwe ukuze ilungisiswe.
Lokhu kudale ukuba abenhlanganiso yePremier Soccer League bamise imidlalo yona ekhangelelwe ukuba iqhubekele phambili ekuqaleni kukaNtulikazi.
Inkundla yeRufaro kanye leyeGwanzura zona zavalwa kudala njalo eyeRufaro umasipala wedolobho leHarare uphezu kokuqhuba inhlelo zokuyivuselela.
Emdlalweni kakhilikithi odlalwe namhla iqembu leZimbabwe linqobe eleWest Indies ngama runs angamatshumi amathathu lanhlanu emdlalweni owokudinga amaqembu azakuyaphatheka kumncintiswano wezizwe zomhlaba ozaqhutshelwa elizweni leIndia ekupheleni komnyaka.
Iqembu leZimbabwe yilo eliqale ukutshaya ibhola lathola ama runs angu 268 kuma overs angamatshumi amahlanu kwathi eleWest Indies seliphendula lithole ama runs angu 233 kuma overs afika phose kumatshumi amane lanhlanu.
Limpumela itsho ukuba iqembu leZimbabwe yilo eselihlezi phezu kwengalane yesibaya sikaGroup A lilemiklomelo eyisithupha okutsho ukuba lizadlulela kusigaba esilandelayo esomncintiswano eseSuper Six.
Your browser doesn’t support HTML5
Ezemidlalo siloJoseph Njanji