JOHANNESBURG -- Umkhokheli webandla leCitizens Coalition for Change umnumnzana Nelson Chamisa uqhube umhlangano eGermiston, NgoMgqibelo, labasekeli bebandla lakhe abaseSouth Africa, wabakhuthaza ukuthi bahambe ngobunengi bayevota ekhethweni lwalonyaka.
Abasekeli bebandla leCCC, bebegcwele injabulo ngesikhathi umkhokheli wabo uChamisa engena emagumeni esikolo seGermston South Primary, edolobheni leGermiston phandle nje kweJohannesburg.
SAF Chamisa Rally
Esekhuluma labalandeli bakhe uChamisa uthe kuqakathekile ukuthi bangakhutheki ukuba yingxenye yokuletha inguquko eZimbabwe.
“Ngizelapha ukulitshela ukuthi inguquko isifikile eZimbabwe njalo izabakhona lonyaka loba bayafuna kumbe abafuni.”
UChamisa uthe lalabo abehluleke ukubhalisela ukuvota kusasekhona abangakwenza ukuphatheka kulolukhetho.
SAF Chamisa Rally
“Ngizimisele ukuguqula yonke into engahambi kahle lakho konke okungaliphathi kahle eZimbabwe.”
Uqhubeke ethi konke osekufile elizweni uzakuvusa nxa engangena esihlalweni ngoba isifiso sakhe yikuthi bonke abasemazweni babuyele ekhaya wasebonga iSouth Africa ngokugcina izizalwane zeZimbabwe.
Lokhu bekungokwkuqala ukuthi uChamisa aqhube umhlangano omkhulu kangaka labasekeli bebandla lakhe kweleSouth Africa. Leyinto ejabulise abasekeli bebandla lakhe.
Ilunga laleli bandla umnumnzana Emmanuel Banda uthe ukuza komkhokheli wabo sekubaphe intshukuntshu yokuvota ekhethweni oluzayo.
SAF Chamisa Rally
“Sijabule kakhulu ukuthi umkhokheli wethu omkhulu oweTripple C uze lana ukuzosigqugquzela ukuthi sihambe siyovota. Ngokokuqala ukuthi aze njalo abantu bajabule kakhulu. Lobanje bekuyishort notice kodwa abantu babonisa ukujabula ukuthi babuye bazombona bezwe ukuthi usiphatheleni.”
Omunye wabatsha uNkosazana Remembrance Ndlovu uthi njengabatsha sebekulungele ukuletha inguquko abayifisayo eZimbabwe.
“Ngingathi iningi labayouth lirejestile. Ngitsho lasemakhaya bebekhona abathungameli abekade bethwala abantu kumaward lakuzo zonke indawo bahamba futhi ikakhulu iyouth ngobunengi bayarejesta. So into ekhona manje njengoba lokurejesta ngoba sekuvaliwe into ekhona yikuthi sigqugquzele abarejestileyo ukuthi behambe bayevota and beprotecte ivoti labo.”
Unkosazana Semukelwe Mpala yena uthi ukhetho lwamhlaka 23 Ngcwabakazi lithuba eliqakatheke kakhulu kuzizalwane zonke zeZimbabwe.
“Ngicela sivotele utshintsho. Ngicela sikhuthaze abazali lamafamilies emakhaya ukuthi sivote kahle because we want change. Sifuna ukubuyela ekhaya siyosebenza. Sikhathele ukuhlukumezeka kumaforeign countries.”
SAF Chamisa Rally
Umgcinisihlalo weCCC kweleSouth Africa umnumnzana Trust Ndlovu uthi bajabule kakhulu ngenani labantu abaze kulo umhlangano abafike kubantu abayinkulungwane.
Umhlanganolo uza ngesikhathi lapho kusanda ukucwaswa kwabakwamanye amazwe kweleSouth Africa osekusenza inengi lezizalwane zeZimbabwe zifise ukubuyela ekhaya. Kodwake inengi kalenelisanga ukubhalisela ukuvota njengba bengaliphiwanga ithuba lokubhalisa beseSouth Africa lapho abasebenzela khona.
Abangabhalisanga abebekulo umhlangano bathi bazasebenza gadalala ukuxhasa ababhalisileyo ukuthi bayevota.
Kusasa umnumnzana Chamisa ukhangelelwe ukuqhuba omunye umhlangano lapha azakwethula khona ukuthi nxa engangena kuhulumende, uhulumende wakhe uzasebenzisana ngayiphi indlela lezizalwane zeZimbabwe ezisemazweni.
Your browser doesn’t support HTML5
Udaba lomhlangano wabeCCC eSouth Africa siluphiwa nguThuso Khumalo