NKAYI - Uhulumende wakha idamu emfuleni uTshangane eNkayi elilakho ukuguqula impilo yabantu esigabeni lesi okungani khona izulu ngemfanelo minyaka yonke.
Idamu leli elibizwa ngokuthi yiZiminya Dam, elasungulwa ekuqaleni komnyaka ngokutsho kwengcitshi zeZimbabwe Water Authoririty ezilakhalayo, lizakuba yisilinganiso somango ongamakhilomitha amathathu lengxenye - 3.2 kilometers.
UMnumzana Alois Katsande, obona ngokwakhiwa kwedamu leli, utshele umsakazo weStudio 7 ukuba sebesebangeni eliphezulu lesakhiwo lesi lapha abagebha khona imingcele kanye lokusukumisa imiduli ezabamba amanzi amanengi azasetshenziswa yizakhamizi ukulima okutshiyeneyo.
Uthi kukhangelelwe ukuthi lumsebenzi uzagqitshwa ngomnyaka ka2025.
Umqondisi wokwakhiwa kwedamu, uMnu. Alois Katsande
“Lokhu kufuze sikwenze siqede sikhathi sinye ingadi zokulimela, ukwakhiwa kwesititshi sokupheka amagetsi kanye lokwakhiwa kwendawo okuzaphekelwa amanzi ahlambulukileyo eNkayi. Lindawo izavulwa nxa konke lokhu sekuyenzakele. Okwakhathesi sisalabaphenya ukuthi amagetsi sizapheka angakanani njalo sihlose ukupheka amanzi ahlambulukileyo azaphiwa izakhamizi zeMathetshaneni lezikolo njalo sizafaka ithara esuka enkabazwe yeNkayi izobamba kulindawo.”
Ngokutsho kukahulumende kuhlangothi lweTransport and Infrastructure Development, idamu leli kanye lezinye intuthuko okubikwa lizeza lazo lizakwakhiwa ngezigidi zamadola eMelika ezedlula kancane ikhulu lamatshumi amathathu amadollar - 132 million.
Katsande uthi lintuthuko yenzelwe izakhamizi ngemva kokunanzelela ukuswelakala kwamanzi ngemfanelo kulo umango kanye lamathuba emisebenzi abangaziphathisa ngawo.
Uhlolisisa ukwakhiwa kwedamu elitsha eNkayi
“Silazo intuthuthuko ezinengi ezenzelwa izakhamizi. Lokhu okusikho kwabosomabhizimusi abalimayo, kodwa ngokwezakhamizi njalo yibo abangazikhethela indlela abangafuna ukulima ngayo bethole inzuzo.”
UMnumzana Bona Mahlangu, usobhuku weMenda Village, uthi njengenkokheli yomdabu, bayayamukela lintuthuko.
“Le yintuthuko enhle kakhulu ngoba okwakhathesi abantwabethu baqhatshiwe abanengi.Sikhangelele ukuthi ngemva kwalokhu idamu leli lilandela uLake Kariba ngoba kuyabe sekulenhlanzi ezizafakwa khonaphana edamu, kube njalo lama tourists azazobona ngoba kuyabe kuyinkalakatha yedamu eliyaba ngu Lake Kariba omncane.”
UMnumzana Norman Ndebele, ukhansila omele iWard 19, laye uthi lintuthuko idale amathuba emisebenzi esigabeni lesi.
Ziminya Dam
“Kubelusizo kakhulu ngoba besingelandlela abantu ababengathola ngayo imali, abantu bebethwele nzima kithi la kulugwadula kodwa abantu khathesi sebethola imali kuthi lalaba abaku business kubaphakamisile ngoba abantu sebethola imali.”
Ngokutsho kukaKatsande, abantu abedlula ikhulu lamatshumi ayisikhombisa baqhatshiwe kuleli damu. Kodwa ukhansila Ndebele uthi inengi lisebenza imisebenzi engatsholutho.
“Kugcwele kakhulu ogeneral hand, yibo abaqhatshwa kakhulu abanye bayagebha, bayenza imisebenzi nje kodwa abafundele umsebenzi balutshwana loba sesilabo amadrayivayo abakhonapha abahamba ngama tractors lama scavengers.”
Idamu leZiminya ngelesibili elakhiwa nguhulumende kusabelo seMatabelelend North ngemva kweGwayi-Shangani Dam yona ekhangelwe ukuqeda uhlupho lwamanzi kubahlali bakoBulawayo lokuthuthukisa ezokulima.
Uhlelo lokusebenzisa amanzi adonswa edamu leli lwasungulwa ngomnyaka ka1912 lwaphinda lwathathelwa phezulu yiNational Matabeleland Zambezi Water Project. Uhulumende waqhatsha abavela kwele China ukuba belakhe bebambisana lenhlangothi ezimbalwa zelizwe.
SEE ALSO:
Udaba Esilwethulelwe NguNokuthaba Dlamini