HARARE - Kuyaxokozela kubandla leCitizens Coalition for Change, elikhokhelwa nguMnu. Nelson Chamisa, okungakhanyi kahle ukuba ngobani abazalimela kukhetho olukhulu oluzakwenziwa lonyaka. Sekusele insuku ezimbili ukuba kubhaliswe amagama abazancintisa kukhetho oluzaqhutshwa ngoNcwabakazi.
Akwaziwa ukuthi kuzahamba njani ngoLwesithathu kudale leNomination Court okukhangelelwe ukuba ibandla leCCC lizakhetha abantu abazancintisa kukhetho olukhulu oluzayo kulandela ukubuthaniswa kwamagama alabo okuthiwa benze kahle kuhlelo lweConsensus Candidates Selection.
Okwamanje kulamagama ambalwa ezigabeni ezitshiyeneyo ethulwe yinkokheli yebandla leli izolo abalakho ukungena kukhetho lwamakhansila lolwamalunga edale lephalamende. Kulandela ukunqotshwa kuka Mnu. Tendai Biti nguMnu. Rusty Markham, ekubaleni kwabantu ababakhethileyo ngoMgqibelo, uzulu umelele ngamehlo abomvu ukubona ukuthi kuzakhethwa bani phakathi kwababili laba labanye.
UMarkham ukhethwe ngabantu abedlula kancane amakhulu amane – 406 kwathi abedlula amakhulu amathathu lamatshumi phose amane – 337 bakhetha uBiti eHarare East.
Umsekeli wesikhulumeli sebandla leCCC, uMnu. Felix Magalela Mafa, uthi okuhlupha abanengi yikuthi abantu kabajwayelanga indlela entsha yokukhetha inkokheli.
"Abantu abajwayelanga izinto ezintsha. Thina u President watsho ukuba wonke umuntu ku CCC ozangena kukhetho sesiqedile abantu bayawazi"
Lokhu kusekelwa nguNkosikazi Ellen Shiriyedenga, obona ngenhlelo zokhetho kubandla leli.
Kodwa ingcwethi kwezombusazwe zithi okwenzakalayo kuveza sobala ukuba ibandla leli selidabuka phakathi njalo kalilamaqhinga okulwisana lele ZANU PF. UMnu. Mattheas Sithole ngeyinye yezingcwethi ezilombono lo.
"Ngokungakhipha amabizo abo kutshengisa ukuba izinto aziqondanga. Bona ngokwabo kulokungahleleki phakathi kwabo. Akuhambi kuhle."
Eyinye njalo ingcwethi kwezombusazwe, uMnu. Peter Sibindi, osebenza eUniversity of Zimbabwe, uthi kuzakuba nzima ukuthi abanqotshiweyo besebenze labazamela iCCC kukhetho oluzayo.
"Okwenzakala kuCCC kuyaphazamisa abantu ngoba nxa sikhangele sokusele isikhathi esilutshwane ukuba abantu baye kukhetho. Ngabe bayabambana."
Kodwa uMnu. Bekezela Gumbo, ingcwethi kwezombusazwe okunhlanganiso yeZimbabwe Democracy Institute, uthi akula okubi ngohlelo lweCCC. UGumbo uthi lokhu abakwenzayo kulakho ukwenza iZANU PF ingazwisisi indlela ibandla leli elisebenza ngayo.
"ICCC libandla eliphuma ku MDC. Kulabangane abanengi abakade besithi uChamisa uzabavikela. Lokhu kwenzelwa ukuba labo abafuna uMwonzora bengatholi leso sikhathi.”
UMnu. Mabutho Moyo, owebandla leZANU PF kudale leCentral Committee, uthi kusobala ukuba kungani ibandla leCCC linqotshwa kukhetho.
"Ibandla le CCC kabakwazi ukuthi benzani. Bambuzile izolo ukuthi kaphe amabizo abantu. Yikho okuzamenza anqotshwe kukhetho.”
Ibandla leCCC izolo lethulele uzulu amagama abantu abangene kusigaba esiphezulu sokukhethwa nguzulu eseConsensus Candidates Selection ezabelweni zonke zelizwe. Kuzakhethwa abazamela ibandla leli kukhetho oluzayo phakathi kwabantu laba.
SEE ALSO:
Udaba Esilwethulelwe NguMlondolozi Ndlovu