JOHANNESBURG - - Ngesikhathi intsha yakweleSouth Africa ibithakazelela ilanga ele Youth Day, elinanzwa mhlaka 16 Nhlangula, inhlanganiso zabamela abahlala kulelo lizwe, zithi zikhathazeke kakhulu ngenhlupho ezibhekane lentsha yeZimbabwe ehlala kweleSouth Africa, ikakhulu ukusilela kwemisebenzi.
AbeZimbabwe Community in South Africa bathi inengi yentsha yeZimbabwe ibhekane lokusilela kwemisebenzi osekufuqe inengi ukuthi lingene ekusebenziseni izidakamizwa lokuphila ngobusela lokubamba inkunzi.
Ukusilela kwemisebenzi kubikwa njalo sekubamba ngamandla intsha engamantombazana ukuthi izithole isithengisa ucansi ukuze iphile. Indawo yokuhlala ngenye yenhlupho ezihamba phambili njengoba kufuneka umthelo wendlu okuyinto abangelayo njengoba inengi lingasebenzi.
SAF Youth Day
Isikhulumeli sale inhlanganiso umnumnzana Bongani Mkhwananzi uthi okuyinsusa yenengi lalezinhlupho yikuthi inengi labatsha laba alilawo amaphepha okuhlala lokusebenza kweleSouth Africa ngokusemthethweni.
“Kwenza ukuthi abanye bangasayi ezifundweni ukuthi baziqeqetshe ngolwazi namaskills azabanceda ukuthi babe nekusasa eliqhakazekileyo. Nalokhu ukuthi abaphatheki kupolitiki ekhaya kwenza nakho futhi ukuthi ikusasa lezwe lingathembisi ukuthi liyophelelaphi.”
Omunye wenkokheli zabatsha ebandleni leCitizens Coalition for Change kweleSouth Africa uCleopatra Moyo uthi kuzwisa ubuhlungu ukubona inengi lentsha yeZimbabwe isimi emigwaqweni thengisa ucansi.
“Abantwana batshiyela isikolo endleleni. Uyabe ezitshela ukuthi ngingafika eMzansi Africa ngizafika ngisebenze lami ngikwazi ukuqhubekela phambili ngizifundise ngincedise abazali bami but ma efika lapha untwana ethole ukuthi ayikho imali lemisebenzi ayikho abesecabanga ukuthi njengoba ekhaya ngitshiye behlupheka seqala ukungena esitsradeni ethengisa umzimba.”
SAF Youth Day
Okhokhela abatsha ebandleni leZapu kweleSouth Africa uLindani Nkomo uthi abanengi sebeze bangena kuzidakamizwa.
“Begcine belesikhathi sonke behlali ezindlini bengenzi lutho ifrustration leyo begcina bezama ukuthi bekwehlise bengathi bayakhohlwa ngokusebenzisa izidakamizwa.”
Le yinto egcizelelwa ngumunye njalo wabatsha uThobekile Ncube othi inhlupho lezi zigcina zilesidumbu phansi ikakhulu kumantombazana.
“Kulabo abangelancwadi zokuba seSouth Africa kuba nzima kakhulu ngoba imisebenzi asiyitholi amantombazana amanengi aze acina engana emisebenzini yokuthengisa imizimba nokuzinikela ebantwini abalezimali ukuze bakwazi ukuphila. Okunye bazanikela ebantwini laba baze becina bethola imikhuhlane engelaphekiyo kube nzima ukuthi bethole usizo lokwelatsha esibhedlela ngoba kufuneka imali abengelayo sicine silahlekelwa yizihlobo zethu.”
UThandazane Jiyane okhokhela intsha ebandleni leMthwakazi Republic Party uthi inengi labantwana beZimbabwe bazifica sekuyibo abanakakela izimuli bacine besenza loba yini ukuyiphilisa.
“Ipoverty ngenye yento eyisiqokoqela eyenza ukuthi ulutsha lungene kuprostitution ngoba vele utholle ukuthi nguyena asebebhekele kuye. Acine esengena kuprostitution umntwana ngoba amathuba omsebenzi mancane.”
Abanyeke bathi okungenza lezi inhlupho ziphele yikuthi intsha yeZimbabwe idlale indima ekhethweni oluzayo ukuthi kulunge ekhaya ibuyele. Enkulumeni yakhe kwabatsha lamhlanje umsekeli kamongameli. Ummeli weZimbabwe kweleSouth Africa umnumnzana David Hamadziripi uhleli ekhuza intsha yeZimbabwe ukuthi ingaqali ukuphatheka emisebenzini yokuganga ezweni lokuhamba.
Your browser doesn’t support HTML5
Udaba lokunanza ilanga labasakhulayo kweleSouth Africa siluphiwa nguThuso Khumalo