WASHINGTON DC – Amabandla ezombusazwe atshiyeneyo athukuthele phezu kwesinqumo esithethwe yikomidi yePhalamende ebona ngezemithetho, esokuthi imali ehlawulwa ngabafuna ukuncintisa kukhetho oluzayo ayisoze yehliswe.
Ukhetho lolu luzakwenziwa mhlaka 23 ngoNcwabakazi.
Amalunga ePhalamende agoqela aweZanu PF laweCCC lawo athukuthele ngoba engaphiwanga ithuba lokuhlafuna loludaba.
Athi iPortfolio Committee on Justice, Legal and Parliamentary Affairs ibimele yethule loludaba ePhalamende luhlaziywe ngamalunga wonke jikelele hatshi ukuthi ithathe isinqumo iyodwa ibuye yale ukuwapha izizatho.
Inkantolo yeConstitutional Court ilaye iPhalamende ngeviki edluleyo ukuthi kusiyafika ngoLwesihlanu, kusas,a kumele ibisivumelene ekutheni yehliswe yini limbhadalo.
Loludaba lufikiswe emthethwandaba lo ngumkhokheli webandla leNationalists Alliance Party uMnu Devine Mhambi Hove esithi iZimbabwe Electoral Commission kumele ibanjwe ngamandla yehlise limali ngoba inengi kakhulu.
Umthetho uthi labo abancintisa kukhetho lukaMongameli kumele babhadale inkulungwane zamadola aseMelika ezingamatshumi amabili, US$20,000 kuthi abancintisa kukhetho lwamalunga ePhalamende bona kumele babhadale inkulungwane eyodwa, US$1,000.
Amabandla amanengi athi akalayo limali. Abancintisa kukhetho lwamakhansila bona ababhadali lutho.
Isikhulumeli sebandla leCCC koBulawayo uMnu Swithern Chiroodza utshele iStudio 7 ukuthi badangele ngesinqumo sePortfolio Committee on Justice, Legal and Parliamentary Affairs.
Your browser doesn’t support HTML5
Ingoxo loMnu Swithern Chiroodza
Ilunga leZanu PF uMnu Believe Gaule laye uthe limali inengi kakhulu.
Your browser doesn’t support HTML5
Ingxoxo loMnu Believe Gaule