WASHINGTON DC – Umeli weZengeza West edale lePhalamende, oyisiphathamandla sebandla leCCC, uMnu Job Sikhala, ufikisa umnyaka ogcweleyo namuhla evalelwe ejele lezigebengu ezesabekayo eleChikurubi Maximum Prison.
Elinye lamagqwetha akhe uMnu Michael Masarirevhu uthi uSikhala uzamiswa enkantolo kamantshi namuhla. USikhala ubotshwe mhlaka 14 ngoNhlangula nyakenye esetheswa icala lokuphehla udlakela eNyatsime.
Ngemva kokuvalelwa lamanye amalunga eCCC alitshumi lanhlanu, uSikhala wasuka wetheswa amanye njalo amacala atshiyeneyo alokhe abhekane lawo.
Wabotshwa ngemva kokwethula amazwi esililweni selunga lebandla lakhe uNkosazana Moreblessing Ali, owathunjwa wagongodwa ngumsolwa obikwa elilunga leZanu PF wamquma-quma umzimba wayajikela izitho zakhe emthonjeni.
Ngenyanga edluleyo uSiikhala ufunyanwe ngumthethwandaba kamantshi eHarare elecala lokuvimba ukusebenza komthetho, wasehlawuliswa ifayindi yamakhulu amadola akweleMelika ayisithupha, US$600.
USikhala usecele kanengi ukuthi akhululwe ngemali yesibambiso, i-bail, kodwa walelwa yzinkantolo zabomantshi labahluleli beHigh Court.
Ibandla leCCC lithi uyahlukuluzwa ngabomo yiZanu PF ngendaba zombusazwe, kodwa yona iZanu PF iyakulandula lokhu isithi uSikhala uyisephulamthetho esimele sibhekane lamacala aso.