GABORONE – Ezinye izizalwane zeZimbabwe ezivela eMatebeleland ezisebenza kweleBotswana seziveze umdlandla wokungena kubhizimusi lokwemba ekhaya.
Zithi akulunganga ukuba inotho yeMatabeleland ithaphuzwe ngabantu abavela kwezinye izigaba zona zigoqe izandla nje.
Lokhu kuvele emhlanganweni wokubonisana ngamathuba kuhlangothi lokwemba, oqhutshwe ngabeZimbabwe abedlula amakhulu amabili alengxenye, enkundleni yeWhatsApp abangamalunga enhlanganiso yeSibanye Cultural Society.
Ingcwethi exwayise abanye ngamathuba la kulumhlangano, uMnu Dhumani Gwetu, ongumanjinela, uthe kuqakathekile ukuthi abantu bathole ulwazi olujulileyo ngalelibhizimusi bengakagxumukeli.
“Ezokwemba abantu bakithi bacabanga ukuthi ayisiyo bhizimusi abangayenelisa, kucine kufike abantu abavela ngaphandle, bakwenze baphumelele sibakhangele,” kutsho uGwetu.
“Kusemandleni ethu ukuthi silande ingatsha zikahulumende sithole amalungelo lathi njengabanikazi bendawo.”
Barras de oro en una refinería de Estambul, Turquía.
Umsekeli kamphathisihlalo kunhlanganiso yeSibanye Cultural Society, uMnu Bekithemba Jele uthe babone kuqakathekile ukuqoqa lumhlangano ukuze abantu benelise ukuba lakho okungabaphathisa ikakhulu uma sebephindela ekhaya.
Uthe, “Zinengi inhlelo ezenzakala ekhaya kodwa uthola ukuthi ziyasikhutha njengabantu abaphandle, ngakho kuqakathekile ukuthi sihlanganise amakhanda sibonisane.”
Ngomnyaka ka2021, uhulumende wakhipha incwadi ezinikeza amankampani ukuthi adinge indawo lapho angemba khona, ezibizwa ngokuthi ngamaExclusive Prospecting Orders (EPOs).
UMnu Jele uthe bayakunanzelela ukuthi kulabanye abafika emhlubulweni weMatebeleland baphiwe izindawo zokwemba kodwa abahlali bendawo basale phandle.
“Indawo ezinengi uyathola ukuthi abanye abavela phandle bayabe sebenze thina esingakwenzanga,” kutsho uJele. “Ngendaba zamaEPOs uthola ukuthi indawo enengi yeMatebeleland isithethwe, isifiso yikuthi abantu beqoqane bengene kubhizimusi yokwemba.”
Okubhizimusi yokwemba igolide kodwa ehlala eBotswana uMnu Faiton Sibanda uthi kuqakathekile ukuthi abantu bebambe iqhaza bengene kubhizimusi lokwemba ngoba bengabuyelwa yinzuzo enkulu.
“Igolide alihluphi ukuthi ulithengise,” kutsho uSibanda. “Uhulumende uyalithatha njalo kulamakampani alithengayo, futhi lithengiswa ngemali yakwamanye amazwe, ungenza kuhle ungaphila sibili.”
Uhulumende weZimbabwe uthi ufuna ukwenza uhlangothi lwezokwemba lube yilo oluhamba phambili ekuthuthukiseni umnotho.
Kodwa abanengi bayakhala ikakhulu eMatebeleland laseMidlands besithi abavela kwezinye izigaba kumbe kwamanye amazwe afana leChina, yibo abacina bethola ama layisensi okwemba ngaphambi kwabo.
Indawo ezinengi eMatebeleland sezingaphansi kwabantu abathola incwadi zokwemba ezama EPOs.
Your browser doesn’t support HTML5
Udaba Siluphiwa nguMqondisi Dube