BULAWAYO - EleZimbabwe limanyane lamanye amazwe ngoLwesibili ngosuku lokunanza abantu abaphila lesimo sejwabu elitshiswa lilanga – olweWorld Albinism Day.
Kunanzwe usuku lolu kulabanye abalokhu besithi isimo lesi sihambelana lobuthakathi kumbe okunye okungahambelani lomphakathi.
Kodwa abazali labaphatheka kunhlelo zokondla abalesimo lesi bathi lokhu kungenzakala emulini ezilembali yokuba lomuntu olejwabu elitshiswa kalula lilanga.
Kulenhlanganiso eziphathisa abaphila leAlbinism eZimbabwe abaphuma emulini eziswelayo ngokubapha usizo lwamafutha okuvikela ijwabu labo ekutshisweni lilanga, okucina kubangela umkhuhlane wemvukuzane.
Inengi labo kuyadingeka njalo ukuthi bathole amangilazi ngoba bevame ukuhlaselwa yimikhuhlane yamehlo.
UNkosazana Sheron Gumbi, ophila leAlbinism ongumqondisi wePrincess Safety Centre Foundation eLuveve koBulawayo, uthi kuqakathekile ukunanza usuku lolu.
“Namula silapha eGwabalanda sinikeza amafutha eSunscreen esiwaphiwe yiZimplants ngakho sinika wonke umuntu olebala. Ngasosonkenisikhathi umuntu olebala kumele abelawo sikhathi sonke."
UNkosazana Yolanda Mpofu, olomntwana ophila leAlbinism, uthi ingane yakhe iyabandlulula.
“Ngemva kokubeletha umntwana olombala lo imuli yami yaqala ukubandlulula umntanami bethi ngilele londofa ngoba elebala. Udadewethu oseGoli nguye omthengela amafutha, usengumntwana kagogo. Abanye abamthandi. Ngiyabonga usizo lwamafutha esiwaphiwe yiZimplants."
UNkosikazi Caroline Kwinda (41) ubonga isipho samakha avikela ukutshiswa lilanga.
"Ngiyabonga ukutholiswa iSunscreen leLip Balm ngihleli ngiwathola amafutha la njalo ayadula okwamagama ubuhle bawo yikuthi asivikela ukutsha ngelanga sicine silemvukuzane yesikhumba. Aqalela kutshumi lamadola eMelika. Ukudula kwawo kuyangokuthi akuvikela kanganani elangeni esithi yiHPF."
UNkosikazi Mary Ndiweni, ohlala eHarrisvale othole amafutha abaphila leAlbinism, uthi isimo lesi sifuna amafutha ahloliweyo.
“Ngilamabalabala embaleni, engalweni lasentanyeni. Odokotela bathi abangelwa yi-ultraviolet light. Kuzacina kudala icancer uma sekuphume kakhulu. Kuhuhlungu loba ngigeza kuyabe sekumele ngigeze ngento ebuthakathaka. Amafutha engiwathole namuhla azangincedisa kakhulu.”
Kulenkulungwane ezedluka amatshumi ayisikhombisa-70,000, zabantu abaphila lesimo lesi eZimbabwe. Emhlabeni jikelele oyedwa phakathi kwabazinkulungwane ezilitshumi lasikhombisa (1 in 17,000), ulesomo lesi.
Abenhlanganiso ezilwela amalungelo abaphila leAlbinism bacele ukuba imuli zingabandlululi abantwana, ikakhulu abazalwa belales’isimo. Bathi kumele bebasize ngokubadingela impahla ezibavikela elangeni ezinjengengwani, amangilazi, amafutha okugcoba amasunscreen njalo bengabavimbi ukuya esikolo.