HARARE - Ummeli weHarare East edale lephalamende, uMnu. Tendai Biti, usekhuthaze ukuba lelidale liphangise ukuhluzisisa ugwalo olulotshwe yikomithi yeParliamentary Legal Committee, olukhuthaza ukwehliswa kwenhlawulo okumele ikhokhwe ngabafisa ukuncintisa kukhetho olukhulu lwelizwe oluqhutshwa lonyaka.
Lokhu kuza ngesikhathi amabandla aphikisayo esithi inhlawulo yabafisa ukuncintisa kukhetho olukhulu lwelizwe inengi kakhulu ngakhoke ayisoze yeneliswe ngabanengi.
Phansi kwesinqumo eseStatutory Instrument 144, abafisa ukuncintisa kukhetho lokudinga uMongameli kuzamele bakhokhe inkulungwane ezingamatshumi amabili zamadola eMelika - US$20,000 kuthi labo abafisa ukuba ngamalunga edale lephalamende bazamele bahlawule inkulungwane eyodwa yamadola eMelika- US$1,000.
Inkuthazo kaBiti le igcizelwe ngu mmeli we Hwange Central, kuleli dale, uMnu Daniel Molokele yena othi imali linhlawulo iphezulu kakhulu.
“Imali ezabhadalwa ngabemeli bephalamende lalabo abafuna ukuba ngo Mongameli belizwe inengi kakhulu nxa sikhangel ukuba wonke umuntu ulelungelo. Kumele njenge phalamende sikuguqukle lokhu.”
Lokhu kusekelwe ngu mmeli we Binga North edale lephalamende uMnu Prince Dubeko Sibanda esithi imali le yenza kube lobandolululo kwezombusazwe.
“Imali leyi sifuna ukuba yehliswe njengalokho okwaphulwa lidale leConCourt. Ungakhangela lokhu okwenziwa yi ZEC kakuzange kulandele eminye imthetho evele isobala.”
Kodwa umphathintambo wezomthetho uMnu Ziyambi Ziyambi uthi limali izakwenza ukuba abantu abafuna ukuba ngoMongameli kube ngabantu abazimiseleyo ngokupheleleyo.
“Imali le ifanele ngoba nxa sikhangela kulabantu abafuna ukungokuncintisa bengalalutho. Sifuna abantu abazimiseleyo ngoba nxa ungela mali le kutsho awuzimiselanga.”
Kodwa uMnu Hebert Chamuka ofuna ukuncintisa ukuba ngu Mongameli phansi kwebandla le People’s Unity Party uthi linhlawulo izakwenza ezombusazwe zifinyelelwe ngabalemali kuphela.
“Uhulumende bekungamelanga avume lokhu. Lokhu kutshengisa ukuba uhulumende kalandaba lathi njalo kafuna ukuzwa insizi zethu ngoba sifuna ukumela uzulu, hatshi ukudinga ukuthi ngubani olemali.”
Lokhu kuza ngesikhathi umthethwandaba we Constiutional Court unikeze idale lephalamende umhlaka 16 Nhlangula ukuba ahluzisise udaba lwenhlawulo le ekhanya ingasoze yeneliswe ngabanengi abalesifiso sokuncintisa kukhetho lwalonya lokudinga amakhansila, amalunga edale lephalamende lomongameli welizwe.
Lokhu kwenzakala ngemva kokuba uMnu Devine Hove ofuna ukuncintisa kukhetho waphanyeka udaba lolu emthethwandaba esithi imali leyi inengi kakhulu.
Idale lephalamende likhangelelwe ukupha umbono walo ngemva kokuba ugwalo lwe PLC khomithi selubekwe phambi kwedale ukuba litsho ukuba imali lezi zehliswe na, loba hatshi.
Idale leNomination Court likhangelele ukubuthana kuviki ezayo mhlaka 10 Nhlangula ukuze benelise ukuvunyelwa ukuncintisa kukhetho.