JOHANNESBURG - UMnu. Zanda Moyo, odabuka eZimbabwe, umiswe emthethwandaba kwele South Africa ngoLwesibili esetheswa icala lokuncedisa ukubaleka ejele komdlwenguli lombulali owaziwa kakhulu kulelilizwe, uThabo Bester.
Eveza isizalwane seZimbabwe lesi emthethwandaba kamantshi eBloemfontein esabelweni seFree State, umtshutshisi uthe uMoyo, oleminyaka engamatshumi amathathu lanye (31), wadala amacala amane ekubalekeni kuka Bester ejele.
Isikhulumeli seviyo labatshutshisi esabelweni seFree State iNational Prosecuting Authority, uMnumnzana Pheladi Shuping, uchazela abezindaba ngamacala abhekane loMoyo.
Wetheswa icala lobuqili, elokuncedisa isibotshwa ukubaleka ejele, elokugcina isibotshwa, lelokubamba isidumbu ngendlela engekho emthethweni.”
Obona ngokuqoqwa kwenhlelo zenhlanganiso ye Sisonke People’s Forum, efuna kuxotshwe abaselizweni ngokungekho emthethweni, umumnzana Freeman Bhengu uthi yikho abahlala bekutsho ukuthi bunengi ubugangi obudalwa ngabantu bokuza.
“Indaba yamaforeigners la eSouth Africa akhomitha icrime sesijwayele la siyazinje ukuthi most of amacrimes agruesome la eSouth Africa, into esingakaze sizibone sizibona from ama illegal foreigners. Ama Zimbabweans akunumber one, ngokucomitha amacrimes la eSouth Africa. And unfortunately, kukhona nalawa amaZimbabweans aright but then asisayiboni kanjalo thina sesibona ukuthi wonke amaZimbabwean ma uze la eSouth Africa azokwenza icrime, azocomitha anyway indlela abangenza imali ngayo.”
Lobanje kungakaziwa ukuthi uMoyo ulecala kumbe hatshi, izizalwane zeZimbabwe sezisole kakhulu labo abafika kuleli baqale ukudala amacala. Isizalwane seZimbabwe njalo eyisiphathamandla sebandla lePAMU umnumnzana Cosmas Ncube uthi lokhu yikho okwenza bonke abeZimbabwe babonakale njengezigangi.
“Siyaxwayisa kakhulu abantwana labafowethu bonke nje abakwaMthwakazi ukuthi bengazitholi sebethinteka ezintweni ezingcolileyo ezingcolisa ibizo likaMthwakazi bengcolisa ubuntu bethu. Yibutshapha babantu bakithi. Singazitholi sesingenela endaweni ezinengi ngoba khathesi abanye abantu abakakwazi ukucabanga bayathi ubugangi benziwa ngabantu bakithi siyizigebenga sonke.”
UThabo Bester wagwetshelwa udilika jele ngemva kokufunyanwa elecala lokudlwengula abesifazana ababili wabulala oyedwa. Waziwa ngokuthi yi ‘facebook rapist’ njengoba abesifazana laba labanye azama ukubadlwengula lokubabulala wayebakhombisa enkundleni yokuxhumana eyebulenjini eyeFacebook.
Ngesikhathi ebaleka ejele yeMangaung esabelweni seFree State lapho abepika khona, watshiya etshise isidumbu eselini lakhe okwenza iziphathamandla zakukholwa ukuthi uzibulele ngokuzitshisa.
Kodwake kucine kuvela ukuthi uBester okukhanye ubelezimali ezinengi, ufumbathise abantu abanengi kakhulu okwenza kwaba lula ukuthi eyisibotshwa alethelwe isidumbu eselini lakhe, asitshise aphume ahambe.
Intombi yakhe ongudokotela uNandipha Magudumana wetheswa icala lokudlala indima enkulu okugoqela lokuletha isidumbu esatshiswayo. Abomthetho bacina befumana ukuthi isidumbu esatshiswayo ngesika, mnumzana Katlego Bereng Mpholo, yena olemuli esisidla amahabulo isithi engabe wabulawa laye ukuze isidumbu sakhe siyetshiswa ejele.
UBester lentombi yakhe baze bayabanjwa sebeseTanzania osekwenze kwabotshwa abantu abaphose bafike itshumi abathinteka ekufohleni kwakhe kugoqela loweZimbabwe lowu.
UMoyo utshele umthethwandaba ukuthi uzayakhuluma lemuli yakhe ngodaba lokudinga igqwetha elizamela kuleli cala. Umantshi uthembisile ukuthi nxa esephinda ukuvela emthethwandaba kuzabe sekulomtoliki weSiNdebele.